Երեկ երեկոյան Էջմիածնում հնչած կրակոցների դեպքը նոր զարգացումներ է ստանում:
Հիշեցնենք, որ կրակոցները հնչել էին մեքենաների վազանցի պատճառով, որի հետևանքով ԱԺ ՀՀԿ խմբակցության պատգամավոր, գեներալ Սեյրան Սարոյանի եղբորորդին ոտքի հատվածում հրազենային վերք էր ստացել:
«Առաջին լրատվական»-ի տեղեկություններով՝ գեներալ Մանվել Գրիգորյանի և Սերյան Սարոյանի եղբորորդիների հետ վիճաբանողն ու կրակողը եղել է Էջմիածնում շատ հայտնի Արմանը, որը Էջմիածնից քրեական հեղինակություն Դոն Պիպոյի (Արթուր Ասատրյան) մտերիմներից է: Դեպքն իրականում տեղի է ունեցել վազանցի պատճառով: Գեներալ Մանվելի եղբորորդին՝ Արայիկ Գրիգորյանը, իր մեքենայով վազանց է կատարել Արմանին, որը կանգնեցրել է նրա մեքենան ու վիճաբանության է բռնվել, թե ինչ իրավունքով է իր ճանապարհը կտրում: Վիճաբանությանը միջամտել է նաև Սերյան Սարոյանի եղբորորդին։ Արմանը երկար չի հապաղել և անցել է զենքի գործադրման ու կրակոցներ արձակել, որից էլ հենց վիրավորվել է Սարոյանի եղբորորդին:
Գեներալները, սակայն, անպատիժ չեն թողել Արմանին: Դեպքից անմիջապես հետո նրանք իրենց մարդկանցով շրջապատել են Արմանի տունը, որտեղ նա ապրում է եղբոր ընտանիքի հետ, ու տարել են Արմանի եղբոր կնոջը: «Հիմա իրենց մոտ գերի են պահում»,- պատմեցին էջմիածինցիները՝ ավելացնելով, որ ամեն ինչ դեռ նոր է սկսվում: «Այդ կրակոցները հեչ, իսկական ռազբորկան էդ երկու կլանների մեջ դեռ նոր է սկսվելու»,- ասացին նրանք:
Նշենք, որ Դոն Պիպոյի և գեներալ Մանվել Գրիգորյանի հարաբերությունները շատ լարված են, նրանք տարիների թշնամություն ունեն: Անգամ, ըստ շրջանառվող խոսակցությունների, ժամանակին Դոն Պիպոն Հայաստանից «արտաքսվել» է հենց գեներալ Մանվել Գրիգորյանի ջանքերով: Գեներալ Մանվելը, օգտագործելով իր հնարավորությունները, Դոն Պիպոյի դեմ էր հանել ոստիկանությունը: Իսկ ոստիկանական հետապնդումների համար հիմք էր հանդիսացել տարիներ առաջ տեղի ունեցած մի միջադեպ, որն ավարտվել էր սպանությամբ: Այդ միջադեպի պատճառով հենց քաղաքի կենտրոնում օրը ցերեկով տեղի էր ունեցել փոխհրաձգություն, որի հետևանքով զոհվել էր պատահական մի անցորդ:
