«Այցը շատ կարևոր էր, որին պարտադիր պետք է մասնակցեինք, քանի որ դրանով հնարավորություն էր ընձեռվել ներկայացնելու ինչպես ՀՀ տեսակետը, այնպես էլ ԼՂՀ տեսակետները, նաև լսել մեր արտասահմանյան գործընկերներին մի շարք կարևոր հարցերի շուրջ: Այդ իմաստով մեր այցը շատ կարևոր էր և հաջողված»,- այսօր «Առաջին լրատվական»-ի հետ զրույցում ասաց օրերս Բաքվում կայացած ՆԱՏՕ-ի խորհրդարանական վեհաժողովի հայկական պատվիրակության անդամ Թևան Պողոսյանը:
Հիշեցնենք, որ Բաքվում հայկական պատվիրակության անդամներին դիմավորել էին բողոքի ակցիաներով, ապա համաժողովի ժամանակ ադրբեջանական պատվիրակությունը Հայաստանի նախագահին անվանեց տեռորիստ, ահաբեկչության մեջ մեղադրեց նաև Թևան Պողոսյանի ընտանիքին:
Թևան Պողոսյանի խոսքով՝ խորհրդաժողովի ժամանակ ռասիստական հայտարարություններ հնչեցին այն պատճառով, քանի որ համաժողովը կայանում էր Բաքվում, և հիմնականում ներկա էին տեղական լրատվամիջոցները:
«Իրենք միշտ փորձում են այդպիսի գաղափարներ հնչեցնել, բայց ավելի հեշտ է լինում, երբ չկա որևէ մամուլ, և համաժողովը տեղի է ունենում միջազգային այլ երկրներում: Իսկ այս դեպքում իրենք ամբողջովին աշխատում էին իրենց մամուլի համար, բայց մենք բոլոր դեպքերում արժանի պատասխաններ տվեցինք»,- ասաց Թևան Պողոսյանը՝ հավելելով. «Երբ որ չկան այլ արգումենտներ, փորձում են անդրադառնալ անձնականին:
Հայրս եղել է ԼՂՀ վարչապետ և փոխվարչապետ, և ես շատ հպարտ եմ այն ամենով, ինչ հայրս է արել Լեռնային Ղարաբաղի կայացման համար: Նա նաև մասնակցել է ազատագրմանը: Եթե իրենք համարում են, որ այդ ամենը այդ տեսակի գործողություն է, ապա բան չունեմ ասելու: Մյուս կողմից էլ՝ հպարտանալու բան է, որ իրենք այդքան լավ գիտեն, թե ովքեր են այնտեղ եղել և ինչեր են արել»:
Նշենք, որ հաջորդ տարի նույն խորհրդաժողովը կայանալու է Հայաստանում, և Ադրբեջանն արդեն իսկ արձագանքել է, որ չի մասնակցելու դրան: Հայկական պատվիրակության անդամն այդ առումով խնդիր չի տեսնում: «Մենք բոլորին հրավիրել ենք հենց Բաքվում: Մենք ողջունել ենք, որ բոլորն էլ գան, Հայաստանում մասնակցեն սեմինարին և ներկայացնեն իրենց տեսակետները: Բայց եթե իրենք մերժեն, դա իրենց խնդիրը կլինի: Միջոցառումը, այնուամենայնիվ, տեղի է ունենալու, և մենք մեր խնդիրներն ենք բարձրաձայնելու՝ ավելի շատ մտահոգված Հայաստանի և ՆԱՏՕ-ի անդամ երկրների հետ համագործակցությամբ»,- ասաց Պողոսյանը: