Ռուսաստանի արտգործնախարար Սերգեյ Լավրովի Բաքու այցին զուգահեռ, Սերժ Սարգսյանն այցելել էր Վրաստան և հանդիպումներ էր ունենում այդ երկրի ղեկավարության հետ: Երկիր, որի իշխանությունները պատրաստվում են Եվրաասոցացման համաձայնագրի ստորագրությանը, և որի հարաբերությունները Ռուսաստանի հետ կայուն վատ են:
Ի՞նչ էր սա՝ դեմարշ Լավրովի այցի դե՞մ, թե՞ հակառակը՝ Ռուսաստանի հանձնարարություն, որի կատարումը Լավրովը կստուգի, երբ հունիսի 22-23-ը գա Հայաստան: Արդյոք Հայաստանի իշխանություններն ի վիճակի՞ են Ռուսաստանի դեմ հանդես գալ դեմարշներով:
Մյուս կողմից, Սերժ Սարգսյանը Վրաստանում հատկանշական մի հայտարարություն է արել՝ ասելով, որ տարածաշրջանային անվտանգության առանցքային գործոններից մեկը հայ-վրացական հարաբերություններն են: «Հարավային Կովկասի տարածաշրջանում առկա փխրուն կայունությունն ու խաղաղությունը մեծապես պայմանավորված են Հայաստան-Վրաստան համագործակցության արդյունավետությամբ և ամրությամբ»,- հայտարարել է Սերժ Սարգսյանը:
Հարցն այն է, որ վերջին շրջանում կովկասյան կայունությունն ավելի ու ավելի է հայտնվում հարցականի տակ, և ավելի ու ավելի է «միս ու արյուն» ստանում հնարավոր պատերազմի ուրվականը: Եվ այս պատերազմի հարցում առանցքային շահագրգռություն է ցուցաբերում Ռուսաստանը, ինչի վկայությունն է ուկրաինական զարգացումներում Մոսկվայի կիրառած մեթոդաբանությունը, որի արդյունքում, ըստ էության, պատերազմի միջոցով է պահվում Ուկրաինան, կամ փորձ է արվում պատերազմի միջոցով կանխել այդ երկրի եվրոպական ընտրությունը: Եվ, ըստ էության, հատկանշական է, որ այս ընտրությունն է կատարել նաև Վրաստանը, և շատ մեծ է հավանականությունը, որ Մոսկվան նույն կերպ պատերազմի միջոցով էլ փորձի Վրաստանը պահել կամ, այսպես ասած, հարամել Վրաստանի եվրաինտեգրացիան:
Միևնույն ժամանակ, սա կարող է լինել Կրեմլի, այսպես ասած, կովկասյան փաթեթի մի մասը, որի կարևորագույն մասը, իհարկե, Ղարաբաղն է, որտեղ Մոսկվան ցանկանում է տեղակայվել ռազմական ներկայությամբ և այս ուղղությամբ գտնվում է Ադրբեջանին ու Թուրքիային ինտենսիվ կերպով սիրաշահելու փուլում: Եվ այս վտանգի ռեալության մասին են խոսում նաև Մինսկի խմբի ամերիկացի ու ֆրանսիացի համանախագահների ակտիվ ջանքերը՝ թույլ չտալ էսկալացիա և կազմակերպել Սարգսյան-Ալիև նոր հանդիպում:
Ահա այս համատեքստում, Լավրովի՝ Բաքու կատարած այցին զուգահեռ, Սերժ Սարգսյանի վրացական այցը իսկապես հետաքրքիր է դառնում, հատկապես տարածաշրջանային կայունության և անվտանգության մասին արված հայտարարության առումով: Սակայն հայտնի չէ, թե արդյոք Հայաստանը Վրաստանին որևէ առաջարկություն ներկայացրե՞լ է այս ուղղությամբ, որպեսզի համատեղ և արդյունավետ ջանքերով հնարավոր լինի ապահովել կովկասյան խաղաղությունն ու կայունությունը: Չի բացառվում, սակայն, որ երկու կողմից առաջարկություններ չեն էլ պահանջվում, ընդամենը պահանջվում է հստակ պայմանավորվածություններ միմյանց դեմ չգործելու վերաբերյալ, և չի բացառվում, որ այս պայմանավորվածությունները այն ծրագիր նվազագույնն են, որ կողմերի հետ կապված՝ առկա է Արևմուտքում:
