Սյունիքի մարզի ընդհանուր իրավասության դատարանում Նապոլեոն Օհանյանի նախագահությամբ ավարտվել է Գևորգ Լաչինյանի գործի դատական քննությունը:
Ըստ դատական ակտի՝ 42-ամյա Գևորգ Լաչինյանը 2014 թվականի մարտի 13-ին, ժամը 17-ի սահմաններում Կապան քաղաքի Ձորք թաղամաս տանող ճանապարհահատվածի սկզբնամասում ընտանեկան հարցերի շուրջ վիճաբանել է նախկին կնոջ՝ Կարինեի հետ:
Գևորգն օրինական կերպով իրեն ամրակցված օդաճնշիչ ատրճանակից մի քանի կրակոց է արձակել նախկին կնոջ դեմքի ու գլխի շրջաններին, ապա ատրճանակը ձեռքին, ձեռքով ու ոտքերով մի քանի հարված է հասցրել կնոջ դեմքին, գլխին, մարմնի տարբեր մասերին:
Տուժողի առողջությանը պատճառվել է թեթև վնաս:
Գևորգ Լաչինյանին մեղադրանք է առաջադրվել ՀՀ քրեական օրենսգրքի 117 հոդվածով:
Ընդհանուր իրավասության դատարանում Գևորգ Լաչինյանն իրեն լիովին մեղավոր է ճանաչել:
Նա հայտնել է, որ Կարինեի հետ ամուսնացել է 2001 թվականին: Համատեղ ամուսնական կյանքի ընթացքում ունեցել են 2 երեխա՝ 9 և 2 տարեկան:
Ընտանեկան տարաձայնությունների պատճառով 2013 թվականին ամուսնալուծվել են:
Երեխաներին պահելու և դաստիարակելու շուրջ տարաձայնությունների պատճառով նախկին ամուսինների հարաբերությունները շարունակել են մնալ լարված:
Դեպքի օրը Գևորգը նախկին կնոջը հանդիպել է պատահաբար: Ցանկացել է խոսել կրտսեր որդու խնամքի վերաբերյալ:
Կարինեին առաջարկել է նստել իր մեքենան, բայց նա չի ցանկացել: Գևորգը նորից է առաջարկել: Կինը նորից է մերժել:
Գևորգը, դատաքննական ցուցմունքի համաձայն, զայրացել է, իջել մեքենայից, բռնել նախկին կնոջ մազերից, գլուխը կռացրել ներքև ու նրան ցավ պատճառելու նպատակով իրեն պատկանող օդամղիչ ատրճանակով կրակել է նրա գլխի կողքին:
Այդ ընթացքում Կարինեն անկանոն շարժումներ է արել՝ փորձելով ազատվել: Դրանից հետո Գևորգը մի քանի անգամ հարվածել է նախկին կնոջ դեմքին ու գլխին:
Դատարանում Գևորգը պնդել է, թե իր նպատակը եղել է նախկին կնոջը ցավ պատճառելը:
Տուժող կինը հայտնել է, որ դեպքի պահին, երբ նախկին ամուսինը կրակել է իր դեմքին ու գլխին, ինքը ցանկացել է ազատվել նրա ձեռքից, բայց չի կարողացել: Կրակելուց հետո Գևորգը ատրճանակով հարվածներ է հասցրել իր դեմքին ու մարմնի տարբեր մասերին:
Օդանճնշիչ ատրճանակի մետաղյա գնդակները ներկայացնելու վերաբերյալ արձանագրությամբ՝ վնասվածքաբան-օրթոպեդ Ասատրյանը ներկայացրել է երկու մետաղե գնդակ ու հայտնել է, որ դրանք հայտնաբերվել են տուժող կնոջ վերքերի առաջնային վիրաբուժական մշակման ժամանակ ու հանվել են նրա գլխի գանգաթաղի շրջանից, իսկ այտային շրջանից հանված մեկ գնդակը ընկել է վիրակապարանում ու կորել է:
Օդաճնշիչ ատրճանակը ներկայացրել է ինքը՝ Գևորգ Լաչինյանը: Դա ինքնալիցքավորվող ատրճանակ է, հրազեն կամ գազային զենք չի համարվում, ըստ դատաձգաբան փորձագետի՝ ատրճանակը «նախատեսված է ժամանցի համար»…
Ընդհանուր իրավասության դատարանը Գևորգ Լաչինյանին մեղավոր է ճանաչել ՀՀ քրեական օրենսգրքի 117 հոդվածով՝ տուժողին դիտավորությամբ թեթև մարմնական վնասվածք պատճառելու համար, ինչն առաջացրել է առողջության կարճատև քայքայում:
Դատարանը հաշվի է առել, որ Լաչինյանի խնամքին են մինչև 14 տարեկան երկու անչափահաս երեխաները, ինչպես նաև այն, որ նա իրեն լիովին մեղավոր է ճանաչել ու զղջացել է կատարածի համար:
Տուժողը քաղաքացիական հայց չի հարուցել:
Գևորգ Լաչինյանը դատապարտվել է 60 հազար դրամ տուգանքի: