Հայաստանում կենդանիների պաշտպանության մակարդակի բարձրացմանն է համապատասխանեցվում նաև օրենսդրությունը: Կառավարության կողմից ներկայացված` «Սննդամթերքի անվտանգության մասին» ՀՀ օրենքում փոփոխություններ և լրացումներ կատարելու մասին օրենքի նախագծի քննարկման ժամանակ ԱԺ ՀԱԿ խմբակցության քարտուղար Արամ Մանուկյանը, հիմնական զեկուցող, գյուղատնտեսության նախարար Սերգո Կարապետյանին դիմելով` նախ պարզապես ընթերցեց օրենքի նախագծում տեղ գտած մի շարք պահանջներ: Ըստ նախագծի` արգելվում է կենդանիներին վախեցնել, սադրել, առանց ցավազրկման ամորձատել, արգելվում է առանց ցավազրկման եղունգների հեռացում, ութ ժամից ավելի տեղափոխման ժամանակ ապահովվում է նրանց հանգիստը` լիազոր մարմնի գիտությամբ, արգելվում է կենդանիների մարմնի դյուրազգաց հատվածը սեղմելը, պոչերը ճզմել, գլուխներից, մորթուց բռնած քարշ տալը, կենդանիներին ուղեկցող մարդիկ հաշվառվում են լիազորված մարմնում, փոխադրման ժամանակ փոխադրողները պահպանում են կենդանիների պաշտպանության և բարօրության պահանջները:
Թվարկումն ընդհատելով` Մանուկյանը նշեց. «Էլի կարդա՞մ, թե՞ հերիք ա… մնացածը դուք կարդացեք: Էս օրենքի նախագիծը… հասկանում եմ` կենդանիների պաշտպանություն, և այլն, բնական է էդ ամենը, բայց դուք չե՞ք նայել էս նախագիծը, արդյոք սա կիրառելի՞ է, և չկիրառելու դեպքում պատժամիջոցներ են պետք, չէ՞: Դուք քննարկե՞լ եք էս կետերի կատարողականը, կենդանիների տեղափոխման դեպքում համայնքներում հատկացրե՞լ եք էն հանգստավայրերը, որտեղ նրանց բարօրությունը պիտի ապահովվի»:
Նախարարը նախ նշեց, թե զարմանալու բան չկա, կենդանիներ են, նրանց նկատմամբ մարդասիրական վերաբերմունք է պետք, դա ԵՄ պահանջներից է, բացի այդ` մենք, ԵՏՄ անդամագրվելով, պետք է շուկայի պահանջներին համապատասխանեցնենք մեր օրենսդրությունը: «Ես գտնում եմ` դրանք պետք է ներառվեն օրենքի մեջ»:
Մանուկյանը արձագանքեց, թե իրեն հետաքրքիր է` այդ խախտումներն ինչպես են բացահայտելու, ինչպես են վերահսկելու: «Ասենք` Եղեգնուտ գյուղի Պողոսը իրա խոզերին կռտում ա` առանց ցավազրկման, ցանկացած մարդ տանը պահող կատվի եղունգները կտրում է առանց ցավազրկման, ես քաշում եմ իմ նապատսանկի ականջներից, մյուսն էլ` կատվի պոչից, ես օրե՞նք եմ խախտում, ու ինձ տուգա՞նք է հասնելու»,- հետաքրքրվեց նա:
Կարապետյանը համաձայնեց, որ Մանուկյանի խոսքում ճշմարտություն կա` որոշ դրույթներ դժվարությամբ կներդրվեն մեր հասարակության մեջ, բայց դա չի նշանակում, որ այդ մասին այսօրվանից չպետք է մտածեն: