«Հայ ազգային կոնգրեսի երեկվա հանրահավաքի տոնայնությունն էր իջել։ Եթե նախկինում ընդդիմությունը խոսում էր վերջնագրերով՝ 15 կետանոց պահանջներով, ապա այս անգամ մենք նկատեցինք, որ ՀԱԿ առաջնորդը որոշակի շեշտադրումների առումով, նաև տոնայնության, կոչերի առումով բավականին մեղմ էր։ Ավելին, խոսքը տանում էր դեպի երկխոսություն, դեպի նորմալ քաղաքակիրթ երկխոսություն»,- այս մասին մեզ հետ զրույցում նշեց Հանրապետական կուսակցությունից ԱԺ պատգամավոր Հովհաննես Սահակյանը։
Մեր հարցին ի պատասխան՝ ցանկանում է ասել, որ իշխանությունը այսօր արդեն պատրա՞ստ է գնալ երկխոսության, նա ավելացրեց. «Իշխանությունը ևս մեկ անգամ ասում է, որ պատրաստ է ռեալ ազատ երկխոսության և ոչ թե ուլտիմատումների ու վերջնագրերի։ Մենք մշտապես գնացել ենք դրան։ Վերջին հանրահավաքի ժամանակ, երբ ընդդիմությունը առաջարկեց երեք կետերի վերաբերյալ բանակցել, ինձ թվում է, եթե դիմի և գա, մենք անպայման հաշվի կառնենք»։
Ի դեպ, Հովհաննես Սահակյանի խոսքերով, այն փաստը, որ այս անգամ բախումներ տեղի չունեցան, վկայում է այն մասին, որ այսօրվա իշխանությունը շատ ավելի ժողովրդավար է և հանդուրժող, քան նախկինում` նույն Լևոն Տեր Պետրոսյանի ժամանակներում։ Հովհաննես Սահակյանը կարծում է, որ կոչերը, թե ցուցարարները վերանվաճեցին Ազատության հարապարակը, մի փոքր ուռճացված են՝ պատճառաբանելով, թե մենք մեր երկիրը վերանվաճելու կարիք չունենք,և նկատեց, որ այսօր կարիք ունենք Արևմտյան Հայաստանը վերանվաճելու։