Սյունիքի մարզի ընդհանուր իրավասության դատարանում հունիսի 19-ին տեղի կունենա Սյունիքի նախկին մարզպետ Սուրիկ Խաչատրյանի առանձնատան մոտ հունիսմեկյան դեպքերի գործով առաջին դատական նիստը: «Առաջին լրատվական»-ի հետ զրույցում Բուդաղյանների պաշտպան Հայկ Ալումյանը նշեց, որ նույն գործով երկու դատավարություններ են նախատեսված, մեկն` Արաբկիրի դատարանում, մյուսը` Կապանում. Արաբկիրում քննվում են փաստաբանի բողոքները` կապված Տիգրանի և Զարզանդի նկատմամբ քրեական հետապնդումը դադարեցնելու որոշումների հետ, իսկ Կապանի դատավարությունը կլինի` ըստ Արտակ Բուդաղյանի դեմ առաջադրված մեղադրանքի:
Առաջին դատական նիստում վկաների հարցաքննության հավանականությունը փաստաբանը չբացառեց, նշեց, որ դատարանի մոտեցումից է կախված: «Ինձ թվում է` դատավորն ուզելու է շուտ քննի ու ավարտի: Այդ պատճառով չեմ բացառում»,- ասաց նա: Քրեական գործում որպես տուժողներ ներգրավված են Սուրիկ Խաչատրյանի կինը՝ Լորետա Բարսեղյանը, և Նիկոլայ Աբրահամյանը, ով նույնպես տուժող է, բայց ոչ` Արտակ Բուդաղյանի գործողություններից: Որպես Ավետիք Բուդաղյանի իրավահաջորդ` դատարանում հանդես կգա նրա հայրը՝ Էմիլ Բուդաղյանը:
Փաստաբանից հետաքրքրվեցինք` ինքը՝ Սուրիկ Խաչատրյանն ըստ գործի նյութերի հարցաքննվելու՚՞ է: «Նա դատակոչված չի: Բայց ես միջնորդելու եմ, որպեսզի հրավիրվի դատարան և հարցաքննվի: Նախաքննության ժամանակ մի քանի անգամ հարցաքննվել է»,- ասաց նա:
Քրեական գործը կքննի դատավոր Նապոլեոն Օհանյանը, դատարանում մեղադրանքը կպաշտպանի դատախազ Կարեն Հարությունյանը: Քրգործում միակ մեղադրյալը Արտակ Բուդաղյանն է, ում «մեղադրանք է առաջադրվել այն բանի համար, որ նա իր եղբայր Ավետիք Բուդաղյանից տեղեկանալով, որ 2013 թ. հունիսի 1-ին, ժամը 22:00-ի սահմաններում Սյունիքի նախկին մարզպետ Սուրիկ Խաչատրյանի ավտոմեքենայում իրեն ծեծի են ենթարկել, նպատակ ունենալով վախեցնել Սուրիկ Խաչատրյանին և նրա ընտանիքի անդամներին, նրանց մոտ առաջացնել տագնապի, սեփական անվտանգության համար անհանգստության զգացում, նույն օրը ժամը 23:00-ի սահմաններում ՎԱԶ 2106 մակնիշի 30 SU 994 պետհամարանիշի ավտոմեքենայով գնացել է Գորիս քաղաքի Դավիթ-Բեկ փողոցում գտնվող Սուրիկ Խաչատրյանին պատկանող առանձնատան մոտ, իր հետ նախապես վերցված, իր անվամբ գրանցված որսորդական հրացանը ձեռքին՝ իջնելով ավտոմեքենայից, սպանության սպառնալիքներ է տվել Սուրիկ Խաչատրյանի և նրա հարազատների հասցեին»