Չնայած նոր կառավարությունն իր ծրագրի «Ժողովրդագրություն» բաժնում խոստանում է աջակցել երիտասարդ ընտանիքներին` «երիտասարդ ընտանիքների ձևավորման գործընթացների վրա նպատակային ներազդման միջոցով», առաջիկա նիստում մերժելու է նորաստեղծ ընտանիքներին 300 հազար դրամ միանվագ օգնություն տալու մասին պատգամավորների առաջարկած օրինագիծը:
Խոսքը ՕԵԿ պատգամավորներ Հեղինե Բիշարյանի, Հովհաննես Մարգարյանի և Լևոն Դոխոլյանի առաջարկած «Նորաստեղծ ընտանիքներին միանվագ դրամական օգնություն տրամադրելու մասին» օրենքի նախագծի մասին է: «Հաշվի առնելով Հայաստանի Հանրապետությունում ծնելիության ցածր մակարդակը, որը պայմանավորված է նաև ամուսնությունների թվի ցածր ցուցանիշով, ինչպես նաև ելնելով Հայաստանի Հանրապետության դեմոգրաֆիական անվտանգության ապահովման խնդիրներից, անհրաժեշտություն է առաջացել պետության կողմից դրամական միջոցների տրամադրմամբ ՀՀ-ում խրախուսել ամուսնությունները և աջակցել նորաստեղծ ընտանիքներին: Օրենքը հնարավորություն կտա նորաստեղծ ընտանիքներին լուծել առաջնային անհրաժեշտության ծախսերից բխող ֆինանսական խնդիրները, ինչպես նաև կնպաստի Հայաստանի Հանրապետությունում ժողովրդագրության և ծնելիության հետ կապված որոշակի խնդիրների լուծմանը»,- գրել են հեղինակները:
Ըստ նախագծի՝ «նորաստեղծ ընտանիք է համարվում Հայաստանի Հանրապետության քաղաքացիական կացության ակտերի պետական գրանցում իրականացնող մարմիններում ՀՀ օրենսդրությամբ սահմանված կարգով, առաջին անգամ ամուսնացող տղամարդու և կնոջ ամուսնությունը գրանցելու օրվանից մինչև 1 տարի ժամկետը ստեղծված ընտանիքը: …Նորաստեղծ ընտանիքներին միանվագ դրամական օգնության իրավունքը տարածվում է այն նորաստեղծ ընտանիքների վրա, որոնք առաջին անգամ իրենց ամուսնությունը գրանցել են ՀՀ քաղաքացիական կացության ակտերի պետական գրանցում իրականացնող մարմիններում ՀՀ օրենսդրությամբ սահմանված կարգով, և որոնց անդամներից գոնե մեկը հանդիսանում է Հայաստանի Հանրապետության քաղաքացի»:
Աշխատանքի և սոցապ նախարար Արտեմ Ասատրյանը օրինագծի վերաբերյալ բացասական եզրակացությունը հիմնավորել է հետևյալ կերպ. «Հայաստանի Հանրապետության կառավարությունը կարևորում է երիտասարդ ընտանիքներին աջակցություն ցուցաբերելու խնդիրները և գտնում է, որ նորաստեղծ ընտանիքներին միանվագ դրամական օգնության տրամադրումն անհրաժեշտ է իրականացնել «Սոցիալական աջակցության մասին» Հայաստանի Հանրապետության օրենքի 5-րդ հոդվածի 1-ին մասի 2-րդ կետով ամրագրված հասցեականության սկզբունքի համաձայն, ըստ որի՝ սոցիալական ծառայությունները տրամադրվում են իսկապես դրա կարիքն ունեցող անձին, այս պարագայում` նորաստեղծ ընտանիքներին… Այդ առումով նախագծում անհրաժեշտ է հստակ սահմանել այն չափանիշները, որոնց հիման վրա հնարավոր կլինի որոշել նորաստեղծ ընտանիքի կարիքավորության աստիճանը: Բացի դրանից, նկատի ունենալով, որ ներկայացված նախագծի հիմնավորման համաձայն` նախագիծը նպատակ ունի նպաստելու ծնելիության աճին, գտնում ենք, որ միանվագ դրամական օգնությունը պետք է տրամադրվի երիտասարդ ընտանիքներին «Պետական նպաստների մասին» Հայաստանի Հանրապետության օրենքի շրջանակներում՝ բյուջետային հնարավորությունների առկայության դեպքում:
…Նախագծի ընդունումը կբերի լրացուցիչ ֆինանսական հատկացումների անհրաժեշտության: Հայտնում ենք, որ այդ նպատակով համապատասխան միջոցներ նախատեսված չեն Հայաստանի Հանրապետության 2014-2016 թվականների պետական միջին ժամկետ ծախսերի ծրագրով, ինչպես նաև Հայաստանի Հանրապետության 2015-2017թվականների պետական միջին ժամկետ ծախսերի ծրագրային հայտում: Ուստի, վերջինիս ընդունման դեպքում այն կմնա առանց ֆինանսական ապահովման:
Ելնելով շարադրվածից` Հայաստանի Հանրապետության կառավարությունը դեմ է ներկայացված նախագծի ընդունմանը»:
Անհասկանալի է միայն, թե ինչու է նոր կառավարությունն իր ծրագրի «Ժողովրդագրություն» բաժնում խոստացել աջակցել երիտասարդ ընտանիքներին, այն էլ` «երիտասարդ ընտանիքների ձևավորման գործընթացների վրա նպատակային ներազդման միջոցով»:
