Շիրակի մարզի ընդհանուր իրավասության դատարանում Մարտին Սարոյանի նախագահությամբ ավարտվել է անչափահաս Ռայա Ամիրխանյանի (անուն-ազգանունը փոխված է) գործի դատական քննությունը:
1997 թվականի սեպտեմբերին ծնված Ռայան 9-ամյա կրթություն ունի: Նա մեղավոր է ճանաչվել ծանր հանցագործության մեջ մեղադրելու սուտ մատնություն կատարելու համար՝ ՀՀ քրեական օրենսգրքի 333 հոդվածի 2-րդ մասի 1-ին կետով:
Ըստ դատական ակտի՝ 2013 թվականի նոյեմբերի 24-ին Ռայան Երևանից մեկնել է Գյումրի՝ իրենց ընտանիքի մտերիմ Սուսաննայի տուն:
Նույն օրը, ժամը 23-ն անց 30 րոպեին Սուսաննան իր ծանոթներ Հովհաննեսի ու Պարգևի հետ վերջինիս մեքենայով անչափահաս հյուրին տարել է Գյումրիի «Գարտ» համալիրի գիշերային ակումբ: Պատվիրել են գարեջուր, շամպայն, հյութ, սուրճ, զվարճացել են մինչև առավոտյան ժամը 4-ը:
Այնուհետև նույն մեքենայով Հովհաննեսն ու Ռայան գնացել են Գյումրիի «Երազանք» մարզաառոջարանային համալիրի հյուրանոց, որտեղ անչափահաս աղջկա մուտքը տղամարդու հետ ընդունվել է գրկաբաց:
Ռայան ու Հովհաննեսը հյուրանոցի սենյակներից մեկում առանձնացել են և փոխադարձ համաձայնությամբ սեռական հարաբերություններ ունեցել միմյանց հետ:
Ռայան, ըստ գործի տվյալների, այդ ժամանակ զրկվել է կուսությունից:
Երբ Ռայան վերադարձել է Երևան, Գյումրիում կատարվածը պատմել է իր մայրիկին, միայն թե կուսությունից զրկվելը և Հովհաննեսի հետ սեռական հարաբերություններ ունենալը ներկայացրել է որպես իր նկատմամբ գործադրված բռնության արդյունք:
2013 թվականի նոյեմբերի 27-ին Ռայան մոր հետ գնացել է ոստիկանություն, նախազգուշացվել սուտ մատնություն կատարելու համար նախատեսված քրեական պատասխանատվության մասին և հաղորդում տվել՝ Հովհաննեսին մեղադրելով ծանր հանցագործության կատարման համար՝ որ նա «Երազանք» հյուրանոցառեստորանային համալիրի 8-րդ սենյակում բռնություն է գործադրել իր նկատմամբ և հակառակ իր կամքի՝ սեռական հարաբերություններ ունեցել իր հետ՝ «փլուզելով» իր աղջկական երազանքները:
Դեկտեմբերի 9-ին Ռայան ոստիկանության նույն բաժնում դիմում է գրել, թե նախկինում տված հաղորդումն իրականությանը չի համապատասխանում, հաղորդումը տվել է՝ հարազատներից վախենալու պատճառով:
Իրականում Հովհաննեսի հետ սեռական հարաբերություններ է ունեցել իր կամքով ու համաձայնությամբ:
Անչափահաս ամբաստանյալուհին իրեն մեղավոր է ճանաչել դատարանում: Նա հայտնել է, թե սուտ հաղորդումը տվել է հարազատներից վախենալով՝ առանց հետևանքները գիտակցելու:
16-ամյա Ռայան նկարագրել է, որ գիշերային ակումբում զվարճանալուց հետո Հովհաննեսի հետ գնացել է «Երազանք» համալիրի հյուրանոց, առանձնացել են ութերորդ սենյակում:
Հովհաննեսն առանց սենյակի լույսը հանգցնելու նստել է իր տեղաշորին, սկսել է համբուրել իրեն, հանել է շորերը:
Ինքը չի դիմադրել, չի գոռացել, սենյակից չի փախել, քանի որ հասկացել է, որ Հովհաննեսը սիրում է իրեն: Իր կամքով տրվել է Հովհաննեսին: Կուսությունը խախտվել է այդ գիշեր: Իրենք չորս անգամ սեռական հարաբերություն են ունեցել: Իսկ սրունքի քերծվածքն առաջացել է ոտքը սափրելու ժամանակ:
Հովհաննեսն ընդունել է, որ աղջիկը կույս է եղել: Նա հայտնել է, որ ինքը բռնություն չի գործադրել, Ռայան շորերը հանել է ինքնակամ:
Պարգևը հայտնել է, թե «Երազանքում» գիշերն անցկացնելուց հետո Հովհաննեսի խնդրանքով նրան ու Ռայային տարել է« պիցայանոց»: Հետո Սուսաննայի հետ միացել են նրանց, հաց են կերել: Որոշել են այդ օրը ևս ուրախ անցկացնել: «Էքսկուրսիա» են կատարել դեպի Ստեփանավան: Վանաձորում նորից հաց են կերել:
Նոյեմբերի 26-ին Սուսաննան ասել է, թե Ռայային պետք է տանեն տուն՝ Երևան: Հովհաննեսի, Սուսաննայի հետ իր մեքենայով Ռայային տարել են Երևան: Ռայայի տրամադրությունը բարձր է եղել: Հովհաննեսն իրեն հետո պատմել է, որ «Երազանք» հյուրանոցում Ռայայի հետ սեռական հարաբերություն է ունեցել նրա կամքով:
Սուսաննան դատարանում հայտնել է, որ հյուրանոցում գիշերելուց հետո Ռայան չի ցանկացել հաջորդ օրն անմիջապես Երևան մեկնել, որովհետև Հովհաննեսի ու Պարգևի հետ մեկնելու էր Ստեփանավան: Ինքն էլ նրան մենակ չթողնելու համար է միացել նրանց:
Երբ երկու օր անց Ռայային տարել են Երևան, ինքը նրա հետ մտել է տուն ու Ռայայի մորն ասել է. «Աղջկադ բերել եմ, սաղ-սալամաթ հանձնում եմ քեզ»…
Ընդհանուր իրավասության դատարանը հաստատված է գնահատել Ռայայի մեղքը ծանր հանցագործության մեջ մեղադրելով սուտ մատնություն կատարելու համար:
Ռայա Ամիրխանյանը դատապարտվել է 6 ամիս ազատազրկման: Նրա նկատմամբ պայմանական դատապարտություն է կիրառվել ու սահմանվել է 1 տարի փորձաշրջան:
