Առաջիկայում Փարիզում կկայանա Հայաստանի և Ադրբեջանի նախագահների հանդիպումը: Հանդիպման հստակ օրը դեռ հայտնի չէ, սակայն լրատվամիջոցների հրապարակումների համաձայն՝ այս հանդիպման հետ մեծ հույսեր են կապում մասնավորապես արևմտյան երկու համանախագահները: Ադրբեջանում ԱՄՆ դեսպան Ռիչարդ Մորնինգսթարը լրատվամիջոցներից մեկի հետ զրույցում նշել էր. «ԱՄՆ-ը կարծում է, որ Ադրբեջանի և Հայաստանի նախագահները փարիզյան հանդիպմանը պետք է հստակ համաձայնության գան հակամարտության կարգավորման հարցում»:
«Առաջին լրատվական»-ի հետ զրույցում Ֆրանսիայի ռազմավարական hետազոտությունների կենտրոնի փորձագետ, վերլուծաբան Կայծ Մինասյանն ասաց, որ հանդիպման նախաձեռնությունը Ֆրանսիայի նախագահ Ֆրանսուա Օլանդին է պատկանում, որի մասին նա համաձայնություն է ձեռք բերել երկու երկրների նախագահների հետ Հարավային Կովկաս կատարած այցերի շրջանակում: Այսինքն՝ ըստ ֆրանսաբնակ վերլուծաբանի, հակամարտող կողմերի նախագահների սեղանին ֆրանսիական առաջարկներն են, որոնց մասին տեղյակ են նաև ամերիկացիներն ու ռուսները:
«Ի նշան հարգանքի Ֆրանսուա Օլանդի հանդեպ՝ նախագահները պատրաստ են հանդիպել, բայց ես կարծում եմ, որ ավելի կարևորություն պետք է տան այդ առաջարկներին հայերը, քանի որ ադրբեջանցիներն այլ տրամադրություն ու նպատակներ ունեն, պարզապես հարգում են Օլանդին և հանդիպում Սերժ Սարգսյանին: Գիտեմ, որ Մինսկի խմբում երկու մշակույթ կա, մեկը՝ ռուսական, մյուսը՝ արևմտյան: Գիտեմ, որ արևմտյան թևը փորձում է ամեն ինչ անել բանակցությունների առաջմղման համար այդ ձևաչափում՝ խաղաղ կարգավորման Մինսկի խմբի շրջանակում։ Ռուսներն այլ կերպ են մտածում և ցանկանում են, որ այլևս Ռուսաստանի շահերն ավելի կարևորություն ստանան Արևմուտքի կողմից: Ֆրանսիայի համանախագահը փոխվեց, և սա այն մեկնարկն է, որից կարող է նրա համանախագահությունը լավ անցնել. այս այցով կարևորություն կտրվի նրան»,- մեկնաբանեց Կայծ Մինասյանը: Սակայն փորձագետը նաև նշեց, որ այցի արդյունքը շատ փոքր է լինելու, քանի որ Ֆրանսիան չունի Ադրբեջանի նկատմամբ ազդեցության այնքան լծակներ, որքան Ֆրանսիան, ուստի առավելագույնն, ինչ կարող է արձանագրվել փարիզյան հանդիպման արդյունքում դա ընդունվելիք համատեղ հայտարարությունն է ու նվազագույնը՝ պարզապես խորհրդանշական հանդիպումը: