Այսօր Հայաստանի ԱԳՆ-ում ՀՀ ԱԳ նախարար Էդվարդ Նալբանդյանի եւ Երեւան ժամանած ԵԱՀԿ գործող նախագահ, Լիտվայի ԱԳ նախարար Աուդրոնիուս Աժուբալիսի միջեւ բանակցություններից առաջ Հայաստանի ԱԳՆ-ի շենքի դիմաց բողոքի ակցիա էին կազմակերպել Լեռնային Ղարաբաղի մի խումբ երիտասարդներ, ովքեր` անգլերեն լեզվով ԵԱՀԿ-ին ուղղված ցուցանակներ էին տեղադրել շենքի մոտ:
Նախաձեռնող խմբի անդամ Արմեն Գրիգորյանը նշեց, որ Արցախի երիտասարդությունը ի պատասխան պարոն Աջուբալիսի հայտարարության, որ տարածաշրջանում եւ Արցախում նոր սերունդ է հասունացել, նրանց պետք է հասկանալ, ի պատասխան նախաձեռնել են մի նամակ, որին միացել են շուրջ տասնյակ հասարակական կազմակերպություններ եւ երիտասարդներ. «Մեր նպատակն է երկխոսություն սկսել ԵԱՀԿ-ի հետ քաղաքացիական հասարակության հետ երկխոսություն սկսելը», նշեց Ա.Գրիգորյանը:
«Առաջին» լրատվականի դիտարկմանը, թե ցուցանակների վրա նշված է, որ Արցախի երիտասարդությունը դեմ է հանդես գալիս Մադրիդյան սկզբունքներին, այդ դեպքում ինչպես են իրենք վերաբերվում այն փաստին, որ Հայաստանի իշխանությունները բանակցում են այդ սկզբունքների շուրջ, որոնցից վեցը բացահայտված են, հետեւաբար ինչու են ԵԱՀԿ գործող նախագահին ուղղում իրենց բողոքը, որ դեմ են Մադրիդյան սկզբունքներին, Ա.Գրիգորյանը նշեց. «Ընդհանրապես, որեւէ որոշում չի կարող դեմ լինել Արցախի հասարակության կամքին: Այսինքն, եթե որոշում են կայացնելու` պետք է Արցախի հասարակության կամքը հաշվի առնեն, եթե նրանց կամքը հաշվի չառնվի` հասարակությունը դեմ է լինելու: Ես նույնպես դեմ եմ նման սկզբունքներին, որոնք խախտելու են արցախցիների իրավունքը»:
Բայց արցախցիները վստահել եւ շարունակում են վստահել ՀՀ իշխանություններին այդ հարցում` նկատեցինք. «Նրանք շարունակում են բանակցել: Դեռեւս վերջնական պատասխան չկա, դեռեւս սկզբունքների մի մասն է բացահայտված, սակայն այն, ինչ բացահայատված է` չի բխում հիմնարար իրավունքների սկզբունքներից», նշեց Ա.Գրիգորյան:
