Թեև կրթության և գիտության նախարարության կողմից շարունակվում է մասնավոր բուհերի օպտիմալացման ծրագիրը, որի ընթացքում մի շարք մասնավոր բուհեր, որոնք չեն համապատասխանում սահմանված չափանիշներին, չեն ապահովում կրթական համապատասխան որակ, փակվում են, այնուամենայնիվ, դեռ կան որոշ բուհեր, որոնք շարունակում են աշխատել ուսանողի վճարած վարձի հաշվին՝ չապահովելով որակ:
Դրա օրինակներից մեկը Երևանի Մեսրոպ Մաշտոցի անվան համալսարանն է, որտեղ ընդունված ուսանողների մեծ մասը դասի չի գնում, չի մասնակցում քննություններին, բայց վերջում ավարտում է՝ ստանալով պետական նմուշի դիպլոմ: Ուսանողներից շատերն իրենք են խոստովանում, որ շաբաթներով դասի չեն գնում և որև է խնդիր չեն ունենում դրա պատճառով: Բայց եթե այդ հանգամանքը շատ ուսանողների ուրախացնում է, ապա որոշներին էլ տխրեցնում է համալսարանի փող աշխատելու նոր միջոցը: Ուսանողների խոսքով՝ արդեն մի քանի տարի է՝ բուհը 4 տարի բակալավրիատում սովորած ուսանողներից շատերին դուրս է թողնում համալսարանից հենց վերջին կուրսում: Դասախոսները ուսանողներին զրկում են դիպլոմից՝ կտրելով պետական ավարտական մեկ կամ երկու քննությունից, ապա պարզաբանում են, թե, իբր, դիպլոմը կտան հաջորդ տարի, երբ ուսանողը կվճարի մեկ կիսամյակի վարձը, որն առնվազն 100 հազար ՀՀ դրամ է: Ասում են, որ այդ ժամանակ ուսանողը նույնիսկ կարող է և չհանձնել որև է քննություն:
Ուսանողների խոսքով՝ որևէ կապ չունի՝ ուսանողն ինչպես է հանձնել մյուս քննությունները, ինչպես է սովորել այդ 4 տարիների ընթացքում, որքան լավ է պաշտպանել դիպլոմայինը՝ հաճախ 20 միավորից ստանալով 20 կամ 19: «Այդ ամենը բացարձակապես կարևոր չէ, կարևորը գոնե մեկ կիսամյակ ավել վճարելն է: Բայց իրենք չեն հասկանում, որ դրանով տարեցտարի պակասելու է իրենց նման անօրեն բուհերի ընդունելության քանակը»,- բողոքեց ուսանողներից մեկը:
Մաշտոցի անվան համալսարանի ռեկտոր Զավեն Սարգսյանը «Առաջին լրատվական»,-ի հետ զրույցում ասաց, որ դա բացարձակ սուտ է: «Ով նման բան ասի, ես իրան դատի կտամ: Նման բան ասողները ստախոսներ են: Ընդհակառակը, իմ մոտ տարեկան ուսման վարձը 20 հազար դրամներով են վճարում»,- ասաց ռեկտորը: Նրա խոսքով՝ միայն անցած տարի 15-20 ուսանող է կտրվել քննությունից, բայց դա կապ չունի մեր նշածի հետ: «Եթե չի պարապել, ի՞նչ անեմ, նշանակե՞մ քննությունը, ինչ է որ՝ վա՞րձ է վճարել, հա՞: Չկա նման բան: Ես անգամ խախտում եմ անում և հնարավորություն եմ տալիս, եթե տոմսը չգիտի, նոր տոմս քաշի: Ինձ հետաքրքիր է, որ իմ ուսանողը լիակատար քննություն տա և ավարտի, որ իմ գլխից հեռանա»,- ասաց Սարգսյանը:
Նա հերքեց, թե դուրս մնացած ուսանողից հաջորդ տարի վարձ է վերցնում: «Մեկ է, եթե նա մնում է հաջորդ տարի, ապա ես նրանից վարձ չեմ վերցնում, նա գալիս է միայն քննություն է տալիս: Ես երբեք ոչ մի դուրս մնացած ուսանողից մի կոպեկ վարձ չեմ վերցրել: Մարդիկ զբաղված են հերյուրանքներով և կլյաուզայով: Եթե գալիս են ձեզ նման բան են ասում, ապա նրանց խորհուրդ տվեք, որ իրենց այդ ասածը գրավոր գրեն, որի դիմաց ես նրանց էն օրը կգցեմ, որ ինքը մոռանա, թե երբ է ծնվել»,- հայտարարեց Զավեն Սարգսյանը:
Նա հասցրեց նաև դժգոհել ընդունելության քննությունները միասնական համակարգով անցկացնելու կարգից՝ այն որակելով խուլիգանություն և իր ու իր հիմնարկի իրավունքների խախտում: «Ո՞վ իրավուքն ուներ իմ իրավունքները վերցնել և իմ բուհի քննությունները դարձնել միասնական: Նախարարն ո՞վ է, կամ այդ կենտրոնական քննական հանձնաժողովն ո՞վ է, որ այդպիսի բան որոշեր: Ամեն բուհ ինքը պետք է իր համար կազմակերպեր իր ընդունելությունը: Այդ միասնական համակարգն ամենամեծ խուլիգանությունն էր: Ճիշտ սխեման աշխատում էր: Ես տարեկան 400-500 ուսանող էի ընդունում, բայց այսօր 30 հոգի են ընդունել»,- ասաց ռեկտորը: