Քրեական հեղինակություն Թևոսիկի եղբոր սպանության բացահայտման գործում չնայած նկատելի առաջընթաց չկա, սակայն առաջիկայում կակտիվանան Մովսես Ներսիսյանի՝ Մոսոյի դիակի որոնողական աշխատանքները, քանի որ նախաքննական մարմինն արդեն իսկ համոզվել է, որ դիակը իրականում դիտահորն է նետվել:
Ինչպես ավելի վաղ տեղեկացրել էինք, դիտահորի հարևանությամբ հայտնաբերվել էր նաև երկու հեռախոս, որոնց մասին խոսք է գնում գործով միակ ապացույց հանդիսացող ձայնագրության մեջ, որի ամբողջական լինելը ևս կասկածի տակ է:
Նշենք, որ, ըստ նախաքննական մարմնի, Իսրայել Սարգսյանը՝ Իսոն, Մովսես Ներսիսյանին՝ Մոսոյին, սպանել էր նախորդ սպանության հետքերը թաքցնելու համար, և դիակը նետել էր Քանաքեռավան գյուղի կոյուղու դիտահորերից մեկը: Նախաքննական մարմինը դրա մասին վկայող ձայնագրություն ունի՝ Իսոյի և Տիգրանի հեռախոսազրույցը, որը մինչ օրս համարվում էր գործով միակ ապացույցը:
Եվ քանի որ նախաքննական մարմինն արդեն որոշակի համոզվածություն ունի, որ դիակը դիտահորն է նետված, ապա ներկայումս Իսրայել Սարգսյանի՝ Իսոյի մեղավորությունն ապացուցելու համար անհրաժեշտ է ամեն գնով գտնել Մոսոյի դիակը: Հակառակ դեպքում Իսոն հանգիստ կարող է ազատվել պատասխանատվությունից:
Այս առումով առաջիկայում ավելի կակտիվանան դիակի որոնման աշխատանքները և փորձ կարվի այդ աշխատանքներում նոր մեթոդներ կիրառել, ասենք՝ դիտահոր իջեցնել ռոբոտ, քանի որ մարդ իջեցնելն այնտեղ անտրամաբանական է համարվում:
Հիշեցնենք նաև, որ նախաքննական մարմինն արդեն իսկ երկու կենդանի խոզ է նետել հորը, որոնք երկուսն էլ անհետ կորել են: Հետևաբար միակ խելամիտ տարբերակը կլինի ռոբոտ կամ նման մեկ այլ սարք օգտագործելը:
Բացի այդ, նշենք, որ գործով արդեն իսկ կան որոշակի փորձաքննությունների պատասխաններ, որոնք նույնպես հետաքրքիր մանրամասներ են պարունակում և լույս են սփռում գործի վրա: Սակայն Իսրայել Սարգսյանի պաշտպան Գայանե Գալոյանը և Տիգրան Ասատրյանի պաշտպան Վարդուհի Էլբակյանը կտրականապես հրաժարվեցին որևէ մանրամասն հայտնել փորձաքննությունների արդյունքների մասին:
«Մենք ստորագրություն ենք տվել, որ նախաքննական որևէ գաղտնիք չենք հրապարակի, այլապես կենթարկվենք քրեական պատասխանատվության»,- ասաց Վարդուհի Էլբակյանը: