Ժողովուրդը երեկ Ազատության հրապարակ մտավ մեծ ցնծությամբ: 3 տարի 17 օր անց կրկին Ազատության հրապարակում հանրահավաք անցկացնելն այնպիսի ոգևորություն էր առաջացրել, որ մարդիկ գրկախառնվում էին ու շնորհավորում իրար: Նույնիսկ շարքային ոստիկանների դեմքին մի տեսակ հրճվանք ու բավարարվածություն կար:
ՀՀՇ վարչության անդամ, նախկին քաղբանտարկյալ Աշոտ Մանուկյանին հանդիպեցինք Սպենդիարյանի արձանի մոտ: Վերջինիս մարտի 1-ին ձերբակալել էին հենց Ազատության հրապարակից` իբր ոստիկանի նկատմամբ բռնություն կիրառելու համար, և ազատազրկել վեց տարի ժամանակով: Ընդամենը ամիսներ առաջ նա վաղաժամկետ ազատ էր արձակվել: «Այստեղ էր խփված մեր վրանը», – հրճվանքով ցույց տվեց արձանին հարող տարածքը: Աշոտ Մանուկյանը պատասխանեց «Ժամանակ»-ի հարցերին:
– 3 տարի 17 օր անց կրկին Ազատության հրապարակում եք: Ինչպե՞ս եք Ձեզ զգում:
– Հպարտ, հավատով լեցուն: Վստահ եմ, որ ավազակապետության վախճանը հաշված օրերի խնդիր է:
– Ազատության հրապարակը վերանվաճելն ի՞նչ էր նշանակում:
– Ազատության հրապարակը վերանվաճելը նշանակում է, որ ոչ ոք չի կարող մեզանից խլել մեր ազատությունը, ազատ ապրելու մեր իրավունքը: Եվ ով փորձ կանի մեր ազատ ապրելու իրավունքը խլել, ապա վախճանն աննախանձելի կլինի, շատ վատ կլինի:
– Սերժ Սարգսյանն իր վերջին հարցազրույցներից մեկում ընդդիմության հանդեպ բավական դրական արտահայտվեց, թեև խնդրեց, որ իր խոսքերը չընդունվեն որպես ռևերանս: Արդյո՞ք իշխանությունների դիրքորոշումը մեղմացել է:
– Ես չեմ հավատում այս իշխանություններին: Սրանք փարիսեցիներ են, սրանց չի կարելի հավատալ: Ընդամենը զգացել են ժողովրդի ուժը, սարսափել են: Իրենք առաջնորդվում են միայն վախով` կա՛մ վախեցնում են, կա՛մ իրենք են վախենում: Հիմա իրենց վախենալու հերթն է հասել: Վախից, ցայտնոտի մեջ ընկած, փորձում են թեկուզ ռևերանսներով, թեկուզ ինչ-որ ձևերով ժամանակ շահել, որպեսզի կարողանան կողմնորոշվել, թե ինչ քայլեր են անելու: Պետք է թույլ չտալ, որ նրանք ժամանակ շահեն:
– Քաղաքական իրադարձությունները կարծես թե կենտրոնացել են մայրաքաղաքում: Դուք ինքներդ Լոռու մարզից եք, Վանաձորից: Իսկ մարզերում ի՞նչ վիճակ է տիրում` մարդկանց տրամադրությունների առումով:
– Խիստ դժգոհ, խիստ լարված: Ժողովրդի մոտ դանակը ոսկորից էլ է անցած: Եթե մի կայծ լինի, ժողովուրդը մարզերում էլ ոտքի կկանգնի` ոչ պակաս, քան Երևանում: Ես վստահ եմ դրանում:
– 88-ը կրկնվո՞ւմ է` Ձեր կարծիքով:
– Ես դրա հոտն եմ առնում, և դա է հոգիս թունդ անում:
