«Դեպի Եվրասիական միություն» ժողովրդական շարժման անդամները այսօր ԱՄՆ դեսպանատան առջև կազմակերպել էին ակցիա՝ պահանջելով, որ դեսպանատան ներկայացուցիչները պատասխանեն 2013թ.-ին իրենց կողմից ուղղված գրավոր հարցմանը: Նրանք փորձում են պարզել, թե ԱՄՆ դեսպանատունը 2000թ.-ին ո՞ր գերատեսչությանը կամ ո՞ւմ է վճարել տարածքի համար նախատեսված գումարը:
«Վճարման մասին փաստաթուղթ չկա, չկան ստորագրություններ, միայն կա բացառիկ պայմանագիր հողի հատկացման վերաբերյալ, փաստաթղթերը իրարամերժ են, կառավարությունը, նախագահականը, արտգործնախարարությունը, Վերահսկիչ պալատն ու քաղաքապետարանը տարբեր հեկտարներն են մատնանշում՝ մեկը 8, մյուսը ՝ 9, մյուսը՝ 10-11, և ոչ մի կոնկրետ բան»,- ընդգծեց «Դեպի Եվրասիական միություն» ժողովրդական շարժման պատասխանատու քարտուղար Իշխան Թովմասյանը՝ հավելելով, որ տարածքը 2000թ.-ին տրվել է ԱՄՆ դեսպանատանը առանց քաղաքապետարանի թույլատվության:
Շարժման անդամ «Հայկանդուխտ» ավանդապաշտ ժողովրդավարական կուսակցության նախագահ Արմենուհի Ղազարյանը ԱՄՆ դեսպանատանը հատկացված հողատարածքի հարցը ակնհայտ կեղծ գործարք է համարում. «Կոռուպցիոն դրսևորումներ միանշանակ կան, որում ներքաշված են այն ժամանակվա վարչապետ Անդրանիկ Մարգարյանը, արտգործնախարար Վարդան Օսկանյանը և այլք»:
Այսօր ցուցարարներին է մոտեցել դեսպանատան վարչակազմի բաժնի ներկայացուցիչը, լսել նրանց, խոստացել փաստաթղթերը ուսումնասիրել: Ակցիայի կազմակերպիչները նկատեցին, որ 15 օր ժամանակ են տվել, որի մասին նաև դիմում են գրել: Եթե պատասխան չտրվի, ակցիայի որոշ մասնակիցներ պատրաստ են նստած մնալ դեսպանատան առջև: