Քրեական օրենսգրքի 258-րդ հոդվածի 4-րդ մասի՝ «խուլիգանություն, որը կատարվել է զենքի կամ որպես զենք օգտագործվող առարկաների գործադրմամբ» հոդվածով մեղադրվող երկու երիտասարդների նկատմամբ երեկ տրամագծորեն հակառակ որոշումներ կայացվեցին: Շանթ Հարությունյանի դատավարության ժամանակ օդամղիչ ատրճանակով ոստիկանների վրա կրակած Հայկ Կյուրեղյանը երկու ամսով կալանավորվեց, իսկ փողոցում վիճաբանության մասնակցած և մարտական «Մակարով» տեսակի ապօրինի ատրճանակից օդ կրակած Սամվել Քոթանջյանը, ով Երևանի քաղաքապետի խորհրդական, Քանաքեռ Զեյթունի նախկին թաղապետ Արայիկ Քոթանջյանի որդին է, ստորագրությամբ ազատ արձակվեց: Ընդ որում՝ Սամվել Քոթանջյանի համար ստորագրել են ՀՀԿ պատգամավորները՝ ՀՀԿ խմբակցության քարտուղար Գագիկ Մելիքյանն ու ՀՀԿ-ական Ռոբերտ Սարգսյանը, ով նաև քաղաքապետ Տարոն Մարգարյանի աներձագն է: Ներկայացնում ենք «Առաջին լրատվական»-ի զրույցը ՀՀԿ պատգամավոր Ռոբերտ Սարգսյանի հետ:
– Դուք երաշխավորել եք Երևանի քաղաքապետի խորհրդականի որդու համար, որ նա կալանքից ազատվի: Քանի որ բավական լուրջ վիճաբանություն է եղել ապօրինի զենքի գործադրմամբ, ճի՞շտ եք համարում Ձեր քայլը, արդյո՞ք նման պարագայում պաշտոնյաների որդիները պետք է ազատ արձակվեն:
– Այո, ես երաշխավորել եմ: Դատավարությունը կլինի, եթե մեղավոր է, կպատժվի, ինչ ա եղել: Ես գործել եմ օրենքի սահմաններում: Ես Սամվելին ճանաչում եմ, ինքը շատ լավ, պարկեշտ, շատ լավ անձնավորություն ա, ասեմ: Դաստիարակված, նորմալ, ես իրան շուտվանից եմ ճանաչում, երաշխավորել եմ, որ մինչև դատավարություն ինքը դրսում գտնվի: Դատավարությունից հետո, եթե ինքը մեղավոր է, միանշանակ պետք է իր պատիժը կրի:
– Պարկեշտ անձնավորություն ասելով` ի՞նչ ի նկատի ունեք, երբ մարդը վիճաբանության մեջ է մտնում և ապօրինի ատրճանակից կրակո՞ւմ է փողոցում:
– Գիտեք, բոլորս էլ, ինձ թվում է, կարող է ընկենք ինչ-որ մի պատմության մեջ, դա չի նշանակում, որ ինքը հանցագործ ա, էլի: Իսկ եթե հանցագործ ա, ինքը միանշանակ իրա պատիժը կկրի:
– Իսկ չե՞ք կարծում, որ անհավասար պայմաններ են ստեղծվում, երբ պաշտոնյաների որդիները, օգտվելով իրենց հոր կապերից, ազատ են արձակվում:
– Ես որպես պաշտոնյա չեմ ստորագրել, ես որպես ինձ հարազատ մարդ եմ ստորագրել: Անկախ նրանից` Քոթանջյան Արայիկը քաղաքապետի խորհրդականն է, թե՝ ոչ, Քոթանջյան Արայիկը իմ ընկերն ա, Սամվելին էլ ես շատ սիրում եմ և շատ ընդունում եմ:
– Նշանակում է՝ Ձեզ հարազատ մարդիկ չպե՞տք է պատասխան տան իրենց արածների համար, չպե՞տք է կալանավորվեն:
– Ինչի՞ եք տենց ասում: Ես ստորագրել եմ, որ ինքը դրսում գտնվի, էդքան բան: Եթե դուք էլ իմ հարազատը լինեիք, Ձեր համար էլ կստորագրեի, եթե ես Ձեզ ճանաչեի:
– Ես ապօրինի զենք չունեմ, չեմ պատրաստվում ապօրինի զենքից կրակել փողոցում, և կարծում եմ՝ Ձեր օգնության կարիքը չունեմ:
– Ես ձեզ չեմ էլ օգնի, ճիշտն ասած, որովհետև ձեզ չեմ ճանաչում:
– Ասել է թե՝ Ձեր բոլոր ծանոթները երաշխավորված են, որ կազատվեն կալանքից, եթե ապօրինի զենքից կրակեն:
– Ոչ, ոչ: …Եթե օրենքի սահմաններում ես բան եմ ստորագրում, ինձ թվում է՝ չհամաձայնելն իրար հետ անիմաստ է դառնում: Ես օրենքի շրջանակներում եմ գործել, անօրինական ոչ մի բան չեմ արել:
– Քանի որ Սերժ Սարգսյանը պարբերաբար հայտարարում է, որ բոլորը պետք է հավասար լինեն օրենքի հանդեպ և այլն, որպես ՀՀԿ-ական պատգամավոր չե՞ք կարծում, որ այսպիսով խախտում եք այդ կանոնը:
– Իսկ ով ասեց, որ օրենքի առջև բոլորս հավասար չենք: Եթե դուք ինչ-որ խախտման դեպք կարաք ինձ ասեք, ես կգնամ, իմ ստորագրությունը հետ կվերցնեմ, բայց ինձ չի թվում, որ ես օրենք եմ խախտել:
– Այսօր կալանավորման որոշում է կայացվել ոստիկանների վրա օդամղիչ ատրճանակով կրակած երիտասարդ Հայկ Կյուրեղյանի գործով, ինչո՞ւ նրա համար չեք ստորագրել:
– Ես էդ տղային չեմ ճանաչում, եթե ճանաչեի, միանշանակ իր համար էլ ստորագրություն կտայի:
– Սակայն հասարակական բավական բուռն արձագանք կա, և ասվում է, որ ոչ համարժեք է նրա կալանքն ու ներկայացված մեղադրանքը:
– Եթե իրան ինչ-որ մարդիկ ճանաչում են, որ կարան երաշխավորեն, որ մինչև դատավարությունը դրսում գտնվի, խնդրեմ, թող գնան, ստորագրեն, ես չեմ ճանաչում:
– Ասել է թե՝ չնայած Դուք պատգամավոր եք, երբ Ձեր հարազատը չի, Ձեզ չի՞ հետաքրքրում, որ մարդը ոչ համարժեք պատիժ է կրում:
– … Գիտեք ինչ, չի կարելի թեկուզ մատը ոստիկանի վրա պահել:
– Իսկ ապօրինի մարտական ատրճանակից օդ կարելի՞ է կրակել փողոցում:
– Դա էլ չի կարելի, ես չեմ ասում, որ ինքը լավ ա արել, ինքը շատ վատ ա արել: Թող դատարանը դա որոշի, ես ո՛չ դատարան եմ, ո՛չ քննիչ եմ, ո՛չ էլ դատախազ եմ:
– Պարոն Սարգսյան, քանի որ ԱԺ-ում Դուք ոչ ակտիվ պատգամավորներից եք, կարելի՞ է իմանալ` ի՞նչն է պատճառը, որ մինչ այժմ ԱԺ-ում ելույթներով, օրենսդրական նախաձեռնություններով հանդես չեք եկել:
– Ժամանակը կգա, ելույթ կունենանք, նախաձեռնություն էլ կունենանք:
– Փաստորեն դեռ չի՞ եկել ժամանակը, չնայած Դուք արդեն բավական ժամանակ պատգամավոր եք:
– Դեռ չի եկել, ոչ: