Չինաստանի Ցզյադին շրջանի դիահերձարանի աշխատակցուհին իր կյանքի ընթացքում ամենամեծ ցնցումն է ապրել, երբ սառցախցում հայտնաբերել է 70-ամյա կնոջ: Ինչպես ավելի ուշ էր հայտնի դարձել՝ ծեր կինը ինքն էր բարձրացել այնտեղ:
Այդ դիահերձարանը ժամանակավոր ապաստարան է չճանաչված կամ հուղարկավորության նախապատրաստված դիակների համար, այդ պատճառով աշխատակիցները չէին սպասում այնտեղ կենդանի մարդու տեսնել, գրում է China Topix-ը: Սակայն երբեմն նման դեպքեր տեղի են ունենում և ընդմիշտ մնում են մարդու հիշողության մեջ:
Վերջերս «ողջ դիակի» հետ միջադեպ էր տեղի ունեցել Չինաստանի Ցզյադին շրջանում: Ինչպես հաղորդվում է Shanghai Daily կայքում՝ հունիսի 5-ին դիահերձարանում հերթապահող աշխատակցուհին նկատել է, որ սառցախցերից մեկի դուռը կիսաբաց է: Քննադատելով անուշադիր գործընկերներին՝ նա մոտեցել է, որ փակի դուռը, սակայն հասկացել է, որ այնտեղ գտնվող 70-ամյա կինը ողջ է:
Սարսափահար բուժաշխատողը փախել է վերակենդանացած դիակից, բայց հետո ինքն իրեն հավաքել է և տեսածի մասին հաղորդել գործընկերներին: Բուժաշխատողների իրականացրած հետաքննությունը ցույց է տվել, որ տարեց կինը հիվանդանոց բերված դիակների թվում հաշվառված չէ:
Իրավիճակի բացատրությունը տվել է հենց «հանգուցյալը»: Նա ընդունել է, որ մտել է սառցեխցիկը, որպեսզի ինքնասպան լինի: Բարեբախտաբար, կնոջ ծրագիրը ձախողվել էր, քանի որ այդ պահին սարքավորումը անջատված է եղել: Այդ մասին գլխի չընկած տարեց կինը համբերատար սպասել է մահվան, քանի դեռ նրան չեն գտել աշխատակիցները:
Այդ դեպքի մասին տեղեկացած իրավապահ մարմինները հաղորդել են, որ կինը տառապել է ընկճախտից և բազմիցս ինքնասպանության փորձեր է արել:
