Ֆրանսիայում ապաստանող ադրբեջանցի քաղաքական գործիչ Ռահիմ Նամազովը ադրբեջանական լրատվական կայքէջում տեղադրված իր նամակով պատմում է, թե ինչպես են ադրբեջանցիները հայերի անուններով փախչում Եվրոպա և այնտեղ ապաստանելու իրավունք ստանում։ Այս մասին այսօր տեղեկացրել է ֆրանսահայ «Նոր Յառաջ»-ը։
Նամազովի խոսքով՝ Զինա Թումանյան կեղծ անուն-ազգանվամբ ադրբեջանուհին, որի իրական անունը Հատիյա Պահատուր է, Թուլուզ քաղաքում զբաղվում է ադրբեջանցի ընտանիքներին հայկական անուններով Եվրոպա փոխադրելու գործով` յուրաքանչյուր ընտանիքից վերցնելով 12 հազար եվրո։
«Այստեղ եկող ադրբեջանցիները տեղական մարմիններին ներկայանում են որպես հայեր, որոնք, իբր, մազապուրծ փախել են հալածանքներից»,- գրում է Նամազովը։ Նրա տեղեկություններով` Պահատուրը արդեն իսկ մի քանի ընտանիք է տեղափոխել Ադրբեջանի Շաքի քաղաքից։
Հետաքրքրական է, սակայն, որ Շաքի քաղաքը հայտնի է որպես անցյալում հայաբնակ և ուտիաբնակ քաղաք. ուտիները կովկասալեզու ժողովուրդ են, որոնց մեծ մասը դավանում է Հայ առաքելական եկեղեցուն, իսկ մյուս մասը ուղղափառներ են և իսլամադավաններ։ Այս մասին Նամազովը ոչինչ չի գրել, այնպես որ` պարզ չէ, թե նշյալ ապաստանածները իսկապես թրքախոս ազերինե՞ր են, թե՞ Ադրբեջանի ազգային փոքրամասնություններ։
