Ավան և Նոր Նորք վարչական շրջանների ընդհանուր իրավասության դատարանում Արմեն Վարդապետյանի նախագահությամբ ավարտվեց Վոլոդյա Նիկոյանի գործի դատական քննությունը:
84-ամյա ծերունին մեղադրվում էր որդուն դիտավորյալ սպանելու համար՝ ՀՀ քրեական օրենսգրքի 104 հոդվածի 1-ին մասով:
Ըստ ծերունու վարկածի՝ որդուն սպանելու դիտավորություն ինքը չի ունեցել:
2013 թվականի հունվարի 11-ին, ժամը 16-ն անց 30-ի սահմաններում Նոր Նորքի 2-րդ զանգվածում գտնվող բնակարանի իր ննջասենյակում անսթափ վիճակում գտնվող որդու կողմից հայհոյելու, իրեն վիրավորելու, բռունցքով գլխին հարվածելու պատճառով Վոլոդյա Նիկոյանը դանակով մեկ անգամ հարվածել է որդու կրծքավանդակի ձախ կեսի սրտապտկային հատվածին և սպանել է նրան:
Գործի դատական քննության ընթացքում մեղադրող Կ. Հովսեփյանը Վոլոդյա Նիկոյանին առաջադրված մեղադրանքը փոփոխեց, նրան նոր մեղադրանք առաջադրեց ՀՀ քրեական օրենսգրքի 108 հոդվածով:
Ըստ մեղադրողի կայացրած որոշման՝ Վոլոդյա Նիկոյանը հարբեցողությամբ տառապող իր որդու՝Վլադիմիրի կողմից դեպքի օրը իրեն ու իր հանգուցյալ ծնողներին հայհոյելու, վիրավորելու, բռունցքով գլխի վիրավոր մասին՝ գագաթային ու ծոծրակային հատվածներին հարվածելուց հետո կորցրել է ինքնատիրապետումը: Հուզված ու վրդովված՝ իր նկատմամբ տեղի ունեցող հանրորեն վտանգավոր ոտնձգությունից, ծերունին կորցրել է հոգեկան հավասարակաշռությունը, պաշտպանվելու համար կիրառել պաշտպանության միջոցներ, ակնհայտորեն գերազանցել է իր նկատմամբ տեղի ունեցած ոտնձգության միջոցները և, ննջասենյակում գտնվող սեղանից անմիջապես վերցնելով դանակը, չպատկերացնելով՝ որդու կողմից կիրառվող բռնությունը դադարել է, թե ոչ, դանակով մեկ անգամ հարվածել է որդու կրծքավանդակի ձախ կեսին ու անհրաժեշտ պաշտպանության սահմանազանցմամբ սպանել է նրան:
Այս նոր մեղադրանքում տարեց ամբաստանյալն իրեն լիովին մեղավոր ճանաչեց ու խնդրեց իր նկատմամբ համաներում կիրառել, դադարեցնել քրեական հետապնդումը և գործի վարույթը կարճել:
Մեղադրողը միջնորդեց Վոլոդյա Նիկոյանին դատապարտել 2 տարի 8 ամիս ազատազրկման, ապա համաներման կիրառմամբ նրան ազատել պատժի կրումից:
Ամբաստանյալի թոռնիկը՝ սպանվածի որդին, պապիկին քաղհայցի պահանջ չներկայացրեց, չառարկեց, որ նրա նկատմամբ համաներում կիրառվի:
Ընդհանուր իրավասության դատարանը որոշեց հանցագործության պահին 83 տարեկան Վոլոդյա Նիկոյանի նկատմամբ համաներում կիրառել, ՀՀ քրեական օրենսգրքի 108 հոդվածով նրա քրեական հետապնդումը դադարեցնել, քրեական գործի վարույթը կարճել:
