Երևան ժամանած ԵԱՀԿ գործող նախագահ, Լիտվայի արտգործնախարար Աուդրոնիուս Աժուբալիսը Հայաստանի ԱԳ նախարար Էդվարդ Նալբանդյանի հետ համատեղ մամուլիս ասուլիսում, իր ելույթի նախաբանում անդրադարձավ արտահայտման և հավաքների ազատությունների խնդրին: «Հավաքների և ազատ արտահայտման ազատությունները էական են ցանկացած երկրի զարգացման համար: Ես ողջունում եմ Հայաստանի իշխանությունների օրենսդրական բարեփոխումների ջանքերը:
Աշխատենք փոփոխել ցույցերի և երթերի մասին օրենքը, ինչպես նաև լրամշակել ռադիոհեռուստատեսության մասին օրենքը: ԵԱՀԿ գրասենյակը պատրաստ է սատարել այս ջանքերին: Եվ, անշուշտ, հանուն հասարակության մեջ կայունության և ժողովրդավարացման առաջընթացի, կարևոր է ապահովել, որ 2008 թ. մարտի դեպքերը չկրկնվեն: Բարեփոխումների ջանքերը պետք է ներառողական լինեն և հաշվի առնեն բոլոր քաղաքական ուժերին ու հասարակությանը:
Մնացած բանտարկյալների ազատումը կօգնի Հայաստանին առաջ ընթանալ և շեշտը դնել բարգավաճման ու ժողովրդավարական բարեփոխումների վրա: Անշուշտ, հաջորդ տարվա խորհրդարանական ընտրությունները պետք է ապահովեն նաև հավաքների և ժողովների ազատության հանդեպ հարգանքը: Նոր ընտրական օրենսգիրը, որը մշակվում է` պետք է հաշվի առնի այն առաջարկները, որոնք արվել են ընտրությունները դիտարկող խմբի վերջնական զեկույցներում»: