Բորիս Սորկինի և Մոդեստ Կոլերովի հիմնած «Ռեգնում» լրատվական գործակալության ղեկավարությունը փոխվում է: Ըստ ռուսաստանյան լրատվամիջոցների, գործակալության տնօրենների խորհրդի ղեկավարությունն արդեն ստանձնել է ռուսական «Գազպրոմ» ընկերության տեղեկատվական քաղաքականության դեպարտամենտի ղեկավար Ալեքսանդր Բեսպալովը: Դեռ անորոշ է՝ կփոխվի՞ արդյոք «Ռեգնում»-ի քաղաքականությունը, թե՞ ոչ:
«Առաջին լրատվական»-ի հետ զրույցում Ռուսաստանի Դաշնության 1-ին կարգի պետական խորհրդական, REX գործակալության ղեկավար, քաղաքագետ Մոդեստ Կոլերովն ասաց, որ ինչպես երևում է՝ այդ տեղեկությունները դեռ խոսակցությունների մակարդակում են, բայց մոտ են իրականությանը: Իրականում հայտնի է, նրա խոսքով, որ խոսքը «Ռեգնում»-ի վերավաճառքի մասին է, «Ռեգնում»-ը վերավաճառվել է «Գազպրոմ մեդիա»-ին ու տրամաբանական է, որ այդ ընկերությունը պետք է ընտրեր ղեկավար «Գազպրոմ» -ի կազմից: « Ինչ վերաբերում է Բեսպալովի անձին, եթե հենց նա իսկապես նշանակվի, ապա ես դա գնահատում եմ բացասական, քանի որ վերջին 11 տարվա ընթացքում, երբ նա զբաղեցնում էր «Գազպրոմ»-ի իր պաշտոնը, ես չգիտեմ որևէ ձեռքբերում իր աշխատանքում»,- ասաց նա՝ հավելելով, թե դժվար է ասել, քաղաքականությունը կփոխվի, թե ոչ: Կոլերովի գնահատմամբ՝ «Գազպրոմ մեդիա»-ն բավականին օրիգինալ քաղաքականություն ունի, օրինակ՝ այնպիսի ռադիկալ լիբերալ, ընդդիմադիր ռադիոկայան, ինչպիսին «Էխո Մոսկվի»-ն է, պատկանում է «Գազպրոմ մեդիա»-ին: «Այս փաստը որևէ կերպ չի անդրադառնում այդ լրատվամիջոցի տեղեկատվական քաղաքականության վրա: Այնպես որ՝ ինչ ասես կարելի է սպասել»,- ասաց Մոդեստ Կոլերովը:
Անդրադառնալով Հայաստանում ՌԴ դեսպան Իվան Վոլինկինի ու հեռուստամեկնաբան Դմիտրի Կիսելյովի աղմկահարույց մեկնաբանություններին՝ ասաց, որ Կիսելյովի մեկնաբանությունները Երևանում նույնքան նվաստացուցիչ էին, որքան Էդուարդ Նալբանդյանի և Հովիկ Աբրահամյանի մեկնաբանությունները ՄՄ-ի վերաբերյալ:
«Այս երեք հռետորները նույն կերպ են արտահայտվել, այսինքն՝ սրանք հավասարապես նվաստացուցիչ են Հայաստանի համար: Այն, որ հայ-ռուսական հարաբերությունները վերածվում են հիմարությունների մրցավազքի մի դաշտի, սա արդեն միտում է: Այո, ցավոք, սա միտում է: Ինչո՞ւ է այդպես, ես կարծում եմ, այն պատճառով, որ հայ-ռուսական հարաբերությունները եղել են և Հայաստանում, և Ռուսաստանում քննարկվում են ոչ կոմպետենտ կերպով: Հայաստանում միլիոնավոր հիմար միֆեր են ստեղծվել Ռուսաստանի մասին, ինչպես և Ռուսաստանում, մի քանի փորձագետներ, որոնք զբաղվում են Հայաստանով, հանդես են գալիս ոչ կոմպետենտ մեկնաբանություններով, միֆոլոգիայով, կոմիքսներով, հիմարություններով: Ուստի հայ-ռուսական հարաբերությունների աղետն այն է, որ նրանք չունեն բավական մասնագիտական և կոմպետենտ քննարկում: Խոչընդոտներ այդպիսի քննարկման համար ես չեմ տեսնում: Միգուցե գոյություն ունեն որոշակի օբյեկտիվ սահմանափակումներ այդ քննարկման համար Հայաստանի ներսում, ես չեմ ասում, թե իշխանությունները թույլ չեն տալիս ինչ-որ բան քննարկել, այլ մտածում եմ, որ իշխանությունը ժամանակ առ ժամանակ առաջ է մղում այդ քննարկումներն ի շահ իրեն, բայց քննարկումը գնում է սխալ ուղղությամբ»,- ասաց Մոդեստ Կոլերովը:
Վերջինս նշեց, որ Էդուարդ Շարմազանովը, Էդուարդ Նալբանդյանը, Հովիկ Աբրահամյանը, Շավարշ Քոչարյանը ջանում էին այնպես անել, որ Ռուսաստանն իրենց շրջվի դեմքով, որ, ի վերջո, նրանց մոտ եկավ Կիսելյովը և ցույց տվեց նրանց այն, ինչ նրանք այդքան ցանկանում էին: «Ուտոպիան այն է, որ ուտոպիան իրականություն է դառնում, ուզո՞ւմ էիք, ստացաք Կիսելյովին: Դուք նմա՞ն Ռուսաստան եք ուզում, կիսելյովյա՞ն Ռուսաստան եք ուզում, ահա նա եկավ ու այդ Ռուսաստանը Ձեզ ցույց տվեց: Ինչո՞ւ եք զարմանում: Հայաստանի ներսում որևէ մեկը ոչ Շարմազանովին, ոչ Շավարշ Քոչարյանին, ոչ Աբրահամյանին չեն քննադատում հիմարությունների համար: Հանրությունն ամոթ չի զգում նրանց կողմից հիմարագույն մեկնաբանություններ լսելիս: Ահա Ձեր հիմար հայտարարություններին եկավ մեր հիմար հայտարարությունը»,- այսպես որակեց կիսելյովյան սինդրոմը Մոդեստ Կոլերովը: