Հովիկ Աբրահամյանը արդեն շուրջ 3 ամիս է, ինչ զբաղեցնում է երկրի վարչապետի պաշտոնը: Հասարակությունը նրանից բարեփոխումների վերաբերյալ արդեն իսկ հասցրել է բազմաթիվ խոստումներ լսել, բայց ակնհայտ է, որ խոստումները չեն իրականացվում, կամ դրանք անգամ աբսուրդի են հասնում: Օրինակ, «պարտադիր, ոչ պարտադրված կուտակայինի» արդյունքը հասարակությունը տեսավ. «Դեմ եմ» գոչող վարչապետը սկսեց «վարագույրից այն կողմ» կուտակայինը առաջ տանել սպառնալիքների լեզվով: Հովիկ Աբրահամյանի խոստումների շքերթից էր նաև ստվերը հարկային դաշտ բերելը: Հ. Աբրահամյանն ասել էր՝ սկսելու է իր մտերիմներից:
«Առաջին լրատվական»-ը հարցախույզ կատարեց՝ հասկանալու համար՝ արդյոք հասարակության անդամները դրական տեղաշարժ են տեսնում Հովիկ Աբրահամյանի պաշտոնավարումից հետո: Հարցախույզի մասնակիցները, մեծամասամբ, ընդգծել են, որ փոփոխություն չկա, չի էլ կարող լինել, նախ՝ լավ թիմ չի ձևավորվել, և, երկրորդ, Հովիկ Աբրահամյանը հիմա զբաղված է իր թիկունքը ընդլայնելով՝ հարազատներին, փեսաներին պաշտոններ տալով: Հարցախույզի մասնակիցները կուտակայինի հարցին անգամ չեն անդրադառնում, այս առումով Հովիկ Աբրահամյանին և նրա գործողությունները արհամարհում են, բայց չեն կարող չանդրադառնալ այն խնդրին, որ վարչապետն իր պաշտոնավարման 100 օրը չբոլորած՝ միայն հարազատ-բարեկամների ու խնամիների համար է դրական փոփոխություններ կատարում:
Հիշեցնենք՝ թերթերից մեկը գրել էր, որ Բագրատաշենի «Զվարթնոց» մաքսատան պետ է նշանակվել է Հովիկ Աբրահամյանի փեսան՝ Վովա Թամրազյանը: Միևնույն ժամանակ, Շենգավիթի հարկայինի պետ է նշանակվել նրա մյուս փեսան՝ Վահան Մամիկոնյանը, որը, ազատվելով Շենգավիթի ոստիկանապետի պաշտոնից, ավելի եկամտաբեր ու խաղաղ աշխատանքի է անցել: