Անցած տարի հուլիսի 27-ին «Մեղեդի» սրճարանի հարևանությամբ տեղի ունեցած Վահան Հովհաննիսյանի սպանությունը մինչ օրս չի բացահայտվել: Գրեթե մեկ տարի է անցել կատարվածքից, սակայն սպանվածի եղբոր խոսքով՝ որևէ նկատելի տեղաշարժ չկա սպանության բացահայտման գործում:
Հիշեցնենք, որ դեպքը տեղի էր ունեցել ուշ երեկոյան Մաշտոցի պողոտայի և Թումանյան փողոցի խաչմերուկում՝ «Մեղեդի» սրճարանի դիմաց: Մի հեծանվորդ վիճաբանության մեջ էր մտել Վահան Հովհաննիսյանի հետ, որը տաքսի վարելիս էր եղել: Մինչ Վահանը ավտոմեքենայից դուրս կգար, հեծանվորդը կրակել էր նրա վրա և դիմել փախուստի: Վահանը կրակոցից որովայնի շրջանում մահացու վիրավորվել էր և հիվանդանոցում, գիտակցության չգալով, մահացել:
«Ինձ չի թվում, որ մեկ տարվա մեջ դժվար է նման դեպքը բացահայտելը: Ինձ թվում է՝ պատճառը ոչ թե ցանկության բացակայությունն է, այլ ոչ պրոֆեսիոնալ լինելը: Դեպքից հետո մեզ ընդունեց անձամբ ոստիկանապետը, խոստացավ, որ դեպքը կբացահայտեն: Ես հավատում եմ նրան, բայց, ցավոք սրտի, գործում, ինչ-ինչ պատճառներով, դեռևս դրական տեղաշարժ չկա»,- «Առաջին լրատվական»-ի հետ զրույցում ասաց Վահան Հովհաննիսյանի եղբայրը՝ Արմեն Հովհաննիսյանը: Նրա խոսքով առայժմ առկա է կասկածյալների որոշակի խումբ, որոնք ստուգվում են:
Ըստ Արմեն Հովհաննիսյանի՝ մինչ օրս էլ պարզ չդարձավ, թե որն էր եղբոր սպանության պատճառը, շարժառիթը: «Ցավոք, ո՛չ պատճառը, ո՛չ կատարողը, իմ կարծիքով՝ նաև պատվիրողը, պարզ չդարձան: Որովհետև ես չեմ կարծում, որ դա իրավիճակային սպանություն էր: Զենքով հենց այնպես քաղաքում հեծանվով չեն շրջում: Ցավոք, այսօր հանրապետությունում արդեն սովորություն է դարձել, որ հեռախոսը կարելի է տանը մոռանալ, բայց զենքը՝ ոչ մի դեպքում»,- ավելացրեց նա:
Մեր հարցին, թե ինչո՞ւ պետք է պատվիրեին եղբոր սպանությունը, կամ ո՞վ կարող էր դար արած լինել, Արմեն Հովհաննիսյանն արձագանքեց. «Նա թշնամիներ չուներ, ուղղակի գործի բերումով գուցե տեսել էր այն, ինչ չպետք է տեսներ: Ես սրան եմ հակված: Հակառակ դեպքում՝ նա ոչ կրիմինալ հեղինակություն էր, ոչ շատ լուրջ բիզնեսմեն»:
Նշենք, որ Վահանն ամուսնացած էր, ուներ 2 երեխա: Եղբոր խոսքով՝ իրենք հոգ են տանում ընտանիքին, երեխաները մեծանում են, բայց ցանկությունը շատ մեծ է, որ սպանությունը բացահայտվի, և մեղավորը պատժվի: «Այս դեպքում ծածկադմփոց անելու մասին խոսք անգամ չի կարող լինել, քանի որ եթե հանցագործությունն արել է սպանողը, ապա ծածկադմփոց անողն անհամեմատ ավելի մեծ մեղք է գործում»,- նկատեց Արմեն Հովհաննիսյանը: