Օրերս «Բարգավաճ Հայաստան» կուսակցության ղեկավար Գագիկ Ծառուկյանը հանդիպել էր Հայաստանի Հանրապետությունում Լիտվայի արտակարգ և լիազոր դեսպան Էրիկաս Պետրիկասի հետ: Ըստ հանդիպմանը հաջորդած հաղորդագրության՝ քննարկվող հարցերի շրջանակը լայն է եղել. հայ-լիտվական բարեկամական հարաբերությունների ամրապնդումից մինչև նոր կապերի հաստատում:
«Առաջին լրատվական»-ի հետ զրուցյում ՀՀ-ում Լիտվայի արտակարգ և լիազոր դեսպան Էրիկաս Պետրիկասն անդրադարձավ հանդիպման մանրամասներին: Նա տեղեկացրեց, որ որպես դեսպան՝ հանդիպում է բոլոր քաղաքական կուսակցությունների ներկայացուցիչների հետ, ինչը բավականին հաճելի է գործընթաց է, ու թեև մեկ տարի է անցել, ինչ ինքը Հայաստանում դեսպան է նշանակվել, հանդիպել է ՀՀ առաջին նախագահ Լևոն Տեր-Պետրոսյանի, ՀՀ երկրորդ նախագահ Ռոբերտ Քոչարյանի, ապա նաև ԲՀԿ ղեկավար Գագիկ Ծառուկյանի հետ:
Դեսպանը տեղեկացրեց, որ Ծառուկյանի բարեգործությունների մասին լսել է, տեղեկություններ եկել են ուղիղ դեսպանատուն, երբ հիվանդ մարդիկ, որոնք արտերկրում բուժման կարիք են ունեցել, ֆինանսական օգնություն են ստացել «Ծառուկյան» հիմնադրամից: Բացի դրանից՝ մշակութային միջոցառումների մասին է լսել, որոնք Լիտվայի համար են առաջնահերթություն:
«Մենք խոսել ենք ամենագլխավոր հարցերի՝ տնտեսական հարաբերությունների շուրջ Լիտվայի ու Հայաստանի միջև: Տեղյակ լինելով տնտեսության ոլորտում այլ երկրների հետ համագործակցության նրա փորձին՝ ես պարզապես փորձել եմ իմանալ, ինչ-ինչ խորհուրդներ լսել, թե ինչպես կարելի է ամրապնդել տնտեսական հարաբերությունները: Քաղաքական հարցեր չենք քննարկել, քննարկել ենք տնտեսական հարցեր»,- ասաց դեսպանը:
Դիտարկմանը, թե ԲՀԿ-ն ՀՀ արտաքին քաղաքական վեկտորի վերաբերյալ հստակ դիրքորոշում չի՞ հայտնել, դա չի՞ դարձել քննարկման առարկա, դեսպանը պատասխանեց, որ՝ ոչ, որովհետև հանդիպումը կրել է բացառապես տնտեսական բնույթ:
Հարցին, թե իրեն չե՞ն կաշկանդել արդյոք այն տեղեկությունները, թե Գագիկ Ծառուկյանը մտերիմ հարաբերություններ ունի եվրոպայի վերջին բռնակալի համարում ունեցող Բելառուսի նախագահ Ալեքսանդր Լուկաշենկոյի, ապա նաև՝ Ուկրաինայի նախկին նախագահ Վիկտոր Յանուկովիչի հետ: «Ես արդեն ասել եմ, որ դա քաղաքավարության այց էր, ես գնացել եմ ծանոթանալու նրա հետ, որպես Լիտվայի նոր դեսպան Հայաստանում: Ինձ համար բոլորը գործընկերներ են, ում հետ ես աշխատում եմ, հանդիպում եմ, ուրախ եմ, որ Հ այաստանում ճանաչում եմ ավելի շատ լավ մարդկանց: Իհարկե, ժամանակ առ ժամանակ ինձ նախատում են, որ ես գնում և բոլոր նախարարների հետ ծանոթանում եմ այն դեպքում, երբ Լիտվան, որպես փոքր երկիր, Հայաստանին կարող է առաջարկել երկու կամ երեք առաջնահերթություն:
Յուրաքանչյուր հանդիպում նոր նախարարի հետ պարտավորեցնում է և, մյուս կողմից, օգնում ավելի լավ ճանաչել Հայաստանը, ավելի լավ ճանաչել այն ոլորտները, որտեղ մենք կարող ենք ինչ-որ բան անել, ուստի ինձ համար դա բնականոն գործընթաց է, դրանք բնականոն աշխատանքային հանդիպումներ են»,- պարզաբանեց Էրիկաս Պետրիկասը: