Իր կարծիքով ինչու՞ երեկվա հանրահավաքի ժամանակ Լևոն Տեր-Պետրոսյանը չմոտեցավ և չբարևեց իրեն: Այս հարցը այսօր լրագրողներն ուղղեցին Ազատության հրապարակում հացադուլի մեջ գտնվող «Ժառանգության» վարչության նախագահ Րաֆֆի Հովհաննիսյանին:
«Ես չեմ ուզում գնահատել որևէ մեկի գործունեությունը կամ անգործությունը: Ես կատարել եմ, կատարում եմ իմ քաղաքացիական պարտքը և ներկա եմ եղել հրապարակում նաև այդ հանրահավաքին: Ողջունում եմ այդ հանրահավաքի կայացումը և ժողովրդի վերադարձը ազատության հրապարակ:
Ամեն մեկը ունի իր նեքին արժեքային համակարգը, իր մարդկային կերպարը, իր քաղաքական դիմագիծը, դիրքորոշումը: Եթե տեղերը հակառակը լինեին, այսինքն` եթե մենք լինեինք հարթակում, և մյուսը հացադուլի մեջ, ով էլ լիներ հացադուլի մեջ գտնվող` նախագահ, թե շարքային քաղաքացի, իշխանական գործիչ, ընդդիմադիր գործիչ, ես կփորձեի առաջինը լինել` իրեն այցելելու և զորակցելու, և իր հետ կիսելու իր ցավը և նաև իր պահանջը լուծելու հնարավորությունը:
Այս դեպքում ես նման ակնկալիքով չէի լցված, ես եթե լինեի, ես կանեի: Իմ կարծիքով քանի որ Առաջին նախագահ շատ խելացի մարդ է, լուսավորյալ մարդ է, կարդացած մարդ է, սա հավանաբար ոչ թե քաղաքական մշակույթի պակաս էր, այլ քաղաքական դիրքորոշում: Եվ իմ մի հոգում` Րաֆֆի Հովհաննիսյանի կարծիքը այն է, որ այդ քաղաքական դիրքորոշումը չի նպաստելու հասարակության և ազգի միասնության համատեղման, իրավատիրության օրակարգին, այլ հակառակը:
Կոչ չեմ անում, ոչ էլ խնդրում եմ կամ պահանջում, բայց արժի, որ բոլոր բոլորը հիմա վերանայեն իրենց սեփական դիրքորոշումը և ինչու չէ նաև քաղաքական մշակույթի իրենց պատկերացումները»,- պատասխանեց Րաֆֆի Հովհաննիսյանը` հավելելով, որ ՀԱԿ-ի բազմաթիվ ներկայացուցիչներ իրեն այցելել են և ինքը «երախտագետ է» այդ այցելությունների համար:
«Ես չեմ տարածում իմ նկատողությունը բոլորի վրա, ես դա չեմ ներկայացնում որպես վերջին ճշմարտություն, Ձեզ հետ կիսել եմ իմ տպավորությունը և հետաքրքրաբար նաև կհետևեմ Ձեր մեկնաբանություններին` իմանալու համար, թե որն է Ձեր տպավորությունը այդ մի պահի նկատմամբ և ընդհանրապես այս հրապարակի հետագա գործունեության և ծավալման առիթով»,- ասաց «Ժառանգության» հիմնադիրը: