Մարտի 18-ին հանդիպում կայացավ Հայաստանի արտգործնախարար Էդվարդ Նալբանդյանի Երևան ժամանած ԵԱՀԿ գործող նախագահ, Լիտվայի արտգործնախարար Աուդրոնիուս Աժուբալիսի միջև:
Ողջունելով հյուրերին Էդվարդ Նալբանդյանը նշեց. “խորհրդանշական էր, որ երեկ՝ Լիտվայի արտգործնախարարի այցելության առաջին օրը, Երևանում նշվեց Լիտվայի Ազգային տոնը:” Նախարարն ասաց, որ խորհրդանշական էր նաև այն, որ Լիտվան առաջին երկիրն է, որ ճանաչեց Հայաստանի անկախությունը 1991 թ.-ին:
Լիտվայի արտգործնախարարը շնորհակալություն հայտնելով Հայաստանի ԱԳ նախարարի ջերմ ընդունելության, երեկ Լիտվայի Ազգային տոնի օրվան նվիրված միջոցառումներին մասնակցելու համար, նշեց, որ հայ-լիտվական համագործակցությունը գտնվում է բարձր մակարդակի վրա և առկա են լավ նախադրյալներ դրանց առավել ամրապնդման և խորացման համար:
Նախարարներ Նալբանդյանն ու Աժուբալիսը մարտի 17-ին ոչ պաշտոնական ձևաչափով մտքեր էին փոխանակել երկկողմ հարաբերությունների, միջազգային և տարածաշրջանային մի շարք հարցերի վերաբերյալ:
Այսօրվա հանդիպմանը նախարարները՝ ընդլայնված կազմով, շարունակեցին քննարկումները՝ կենտրոնանալով ԵԱՀԿ-ի օրակարգային հարցերի շուրջ:
Այս ենթատեքստում Հայաստանի արտաքին քաղաքական գերատեսչության ղեկավարը ասաց. «Հայաստանը ԵԱՀԿ ակտիվ անդամ է, ներգրավված է կազմակերպության գործունեության բոլոր ուղղություններում, իր նպաստն է բերում կազմակերպության բարեփոխումներին, լինի դա Կորֆուի գործընթացի միջոցով, կամ այլ ձևաչափերով»:
ԵԱՀԿ գործող նախագահ Աժուբալիսը Հայաստանի արտգործնախարարի ներկայացրեց լիտվական նախագահության առաջնահերթությունները և նախատեսվող քայլերը:
Ի պատասխան Էդվարդ Նալբանդյանն ասաց, որ Հայաստանը աջակցել է Լիտվայի ընտրությանը որպես ԵԱՀԿ նախագահ և Լիտվայի նախագահության ընթացքում իր նպաստը կբերի այն քայլերին, որոնք ուղղված են կազմակերպության արդյունավետության և դերակատարության բարձրացմանը:
Զրուցակիցներն անդրադարձան Հայաստանում ընթացող բարեփոխումներին, այդ գործընթացում միջազգային կազմակերպությունների հետ համագործակցությանը:
Հանդիպման ընթացքում մանրամասն քննարկվեցին ղարաբաղյան հիմնախնդրի կարգավորման վերջին զարգացումները: Այս ենթատեքստում Էդվարդ Նալբանդյանն ընդգծեց , որ Հայաստանի դիրքորոշումը համահունչ է ԵԱՀԿ շրջանակներում ղարաբաղյան կարգավորման վերաբերյալ արված հայտարարություններին ՝ 2008 թ. դեկտեմբերին՝ Հելսինկիում, 2009 թ. դեկտեմբերին` Աթենքում, 2010 թ. հուլիսին Ալմաթիում, և 2010 թ. դեկտեմբերին՝ Աստանայում, ինչպես նաև եռանախագահող երկրների նախագահների 2009 թ. հուլիսին լ՛Աքվիլայում և 2010թ. հունիսին Մուսկոկայում արված հայտարարություններին:
ԵԱՀԿ գործող նախագահը վերահաստատեց իր աջակցությունը ԵԱՀԿ Մինսկի խմբի համանախագահների միջնորդական գործունեությանը, նրանց կողմից արված առաջարկություններին և կոչերին, մասնավորապես՝ շփման գծից դիպուկահարներին դուրս բերելու կոչին:
Երկուստեք շեշտվեց, որ ղարաբաղյան հիմնախնդրի խաղաղ բանակցային կարգավորումն այլընտրանք չունի:
Էդվարդ Նալբանդյանը և Աուդրոնիուս Աժուբալիսը հանգամանալից քննարկեցին հակամարտության գոտում անվտանգության ամրապնդմանն առնչվող հարցեր: