Մարտի 20-ին Սյունիքի մարզի Կաղնուտ գյուղում կայանալիք համայնքի ղեկավարի ընտրություններում առաջադրված թեկնածուների նյարդերը էլ չեն դիմանում։
Հիշեցնենք, որ առաջադրվել են գործող գյուղապետ, ՀՀԿ անդամ Արթուր Հովհաննիսյանը ու ԲՀԿ, ոչ մի տեղ չաշխատող Կարեն Փարամազյանը: Երկուսից յուրաքանչյուրին էլ թվում է, թե ինքն է հաղթելու։
Մեր ունեցած տեղեկություններով, վերջին մեկ ամսում գյուղացիները հանգիստ չունեն` վեճեր, ծեծկռտուքեր։ Ծեծվում են այն ընտրողները, ովքեր բարձրաձայն ասում են, որ չեն քվեարկելու գյուղապետի օգտին։
Հանրապետականի կողմնակիցներն էլ պնդում են, որ ԲՀԿ-ականները կաշառք են բաժանում։
Սակայն գյուղում լարված իրավիճակի մասին երկու թեկնածուներն էլ ձեռնպահ են մնում խոսելուց։ Ըստ թեկնածուների` մթնոլորտը խաղաղ է ու արտառոց ոչինչ չկա։
Թերևս միակ արտառոցը երևույթն այն է, որ մարտի 17-ին գյուղում ԲՀԿ թեկնածուի օգտին քարոզարշավին մասնակցեց ՀՀ թիվ 38 ընտրատարածքային ընտրական հանձնաժողովի անդամ, ԲՀԿ-ական Արմեն Ավագյանը։ Վերջինս ասել է, որ հանդիպումը սկսվել է ժամը 18-ին, այսինքն` աշխատանքային օրն արդեն ավարտվել էր։
Այնուամենայնիվ նկատենք, որ ՀՀ ընտրական օրենսգրքի 18-րդ հոդվածով ընտրական հանձնաժողովների անդամներին արգելվում է քարոզչություն անել։
Աշխատանքային օրվա և ժամի մասին ոչ մի նշում չկա։