«Դեմ եմ» քաղաքացիական նախաձեռնությունն այսօր իր ակցիան ավարտեց ՀՀ կառավարության դիմաց, որտեղ նրանց դիմավորեց վարչապետ Հովիկ Աբրահամյանը: Ակցիայի մասնակիցները, սակայն, չմոտեցան վարչապետին, որը բավական երկար կանգնած հետևում էր, թե ինչպես են մասնակիցները բարձրախոսով արձանագրում, որ կառավարությունը կուտակայինի հարցում իրեն ապաշնորհ է պահել, ինչպես նաև, որ այդ հարցում կառավարությունը շարունակում է իր ապաշնորհ գործունեությունը:
Հովիկ Աբրահամյանը մի քանի անգամ խնդրեց, որ իրեն մոտենա բարձրախոսով խոսող երիտասարդը, սակայն նրան այդպես էլ ոչ ոք չմոտեցավ և որևէ պահանջ չառաջադրեց: Փոխարենը մասնակիցները սկսեցին սուլել և վանկարկել՝ «ամոթ»։ Հովիկ Աբրահամյանն էլ պտտվեց և հետ գնաց իր աշխատասենյակ:
«Առաջին լրատվականը» Հովիկ Աբրահամյանից հետաքրքրվեց, թե ինչու պետական մարմինները չեն ընդունում քաղաքացիների դիմումները, ինչին ի պատասխան՝ վարչապետն արձագանքեց, թե այդպիսի բան չկա: Երբ հիշեցրինք, որ հատկապես բժշկական համալսարանը, մի շարք դպրոցի տնօրեններ չեն ընդունում դիմումները, վարչապետն արձագանքեց՝ եթե պարզվի, որ մեկը նման բան է անում, հենց ինքը կազատվի աշխատանքից:
Նշենք, որ ակտիվիստները Հովիկ Աբրահամյանի հեռանալուց հետո, իրենց ձեռքի պաստառները նետելով կառավարության դիմաց, հեռացան:
«Առաջին լրատվականը» ակցիայի մասնակից Վաղինակ Շուշանյանից հետաքրքրվեց՝ ինչ էր նշանակում իրենց վերաբերմունքը: Արդյոք դա արհամարհա՞նք էր վարչապետի և կառավարության նկատմամբ: «Ի՞նչ վարչապետ, վարչապետն էր իջել, մենք նրան չենք տեսել և ոչ մի պահանջ չունենք նրանից: Կոնկրետ ես այլևս նրա ոչ մի խոսքին չեմ հավատում»,- հեգնանքով նկատեց ակտիվիստը:
Մանրամասները՝ տեսանյությում։