«Քառյակի 12 կետերն անհեթեթ են: Հայաստանի կարևորագույն հարցն այսօր բյուջե հավաքելն է, քառյակն իր 12 կետերում մի խոսք անգամ չունի այն մասին, թե ինչպես կարելի է գումար հավաքել, որ հետո դրա հիման վրա աշխատավարձ բարձրացնեն»,- «Առաջին լրատվական»-ի հետ զրույցում նման տեսակետ հայտնեց Քաղաքական և միջազգային հարաբերությունների հայկական կենտրոնի տնօրեն, քաղաքագետ Աղասի Ենոքյանը:
Նա այդ 12 կետանոց պահանջները ներկայացրեց որպես պարզ, պոպուլիստական հայտարարություններ․«Այնտեղ խոսքը միայն այն մասին է, թե ինչպես ծախսել և ինչպես չհավաքել փողեր: Իրենք իրենցից գոհ այդ թուղթը տվել են վարչապետին, միայն մի պատճառ կարող եմ գտնել՝ շոգ է, ուզում են արձակուրդ գնալ: Իրենք համարում են, որ շոգ է ու պետք է հանգստանան՝ սա իրենց արձակուրդի դիմումն է: Կգնան, հետո աշնանը կգան ու կսկսեն նորից պոպուլիստական կհայտարարեն՝ այս-այս բաներն ասացին չարեցիք»:
Ապա Ենոքյանը հավելեց, որ մենք հիմա ունենք «ունիկալ» ազգային միաբանություն՝ բոլոր կուսակցությունները պրոռուսական են․ «Նրանք բոլորը մեր թշնամու կողմից են հանդես գալիս»,- ասաց նա:
Հարցին, թե ինչ պետք է լիներ 12 կետանոց պահանջների մեջ, որ տեղ չի գտել, Ա․Ենոքյանը պատասխանեց․ «Նախ չպետք է լիներ 12 կետ, պետք էր ամենօրյա ախատանք իշխանությունների հետ: Երկրորդ՝ առաջնահերթ խնդիրն այս Եվրասիական միության աղետը կանխելն է: Մենք ակնհայտորեն տեսնում ենք, որ Հայաստանը գնում է թշնամական միջավայր, գնում է մի տեղ, որտեղից ոչ մի օգուտ չունի»:
Մանրամասները՝ մեր տեսանյութում։