Հազվադեպ են այն երկրները, որտեղ ԿԲ բարձրաստիճան պաշտոնյաներին կարող են կառավարության ղեկավար նշանակել:
Այս մասին այսօր «Սիվիլիթաս» հիմնադրամում կազմակերպված քննարկման ժամանակ ասաց ՀՀ նախկին արտգործնախարար Վարդան Օսկանյանը:
Նրա խոսքով, բանկային հոգեբանությամբ առաջնորդվող գործադիրի ղեկավարը իրականում չի կարող արդյունավետ տնտեսական քաղաքականություն իրականացնել, այն էլ` ճգնաժամի պայմաններում, երբ պահանջվում է ընդլայնողական տնտեսական քաղաքականություն:
«Երբ ես կառավարությունում էի, պատերազմ էր գնում ֆինանսների նախարար Վարդան Խաչատրյանի և ԿԲ նախագահ Տիգրան Սարգսյանի միջև: Բանկը իր բնույթով ավելի զսպողական է, հատկապես ճգնաժամային պայմաններում, երբ հակասություններ կան: Իսկ գործադիրը ավելի ընդլայնված քաղաքականություն էր վարում, և այդ հակասությունը ինչ-որ մի միջինի էր գալիս:
Կարծես թե այսօր դա բացակայում է, և կառավարության առջև խնդիրը կարծես թե երկուսն են`գնաճը զսպել և բյուջեն լցնել: Երկուսն էլ ինչ-որ տեղ ամբողջությամբ համընկնում են ԿԲ մտածողության հետ: Ես նայեցի այլ երկրների փորձը, իսկապես հազվադեպ են երկրները, երբ իրենց ԿԲ բանկից մարդ բերեն գործադիր, վարչապետ նշանակեն: Վրացիները արեցին,- Գուրգենիձեն էր,- շատ կարճ` մի քանի ամիս դիմացավ, որովհետև մտածողությունը այլ է, գաղափարախոսությունը այլ է:
ՀՀ-ում ճգնաժամի ամենախիստ պայմաններում մենք չկարողացանք ընդլայնողական քաղաքականություն վարել, զսպողականությունը իշխող էր, որովհետև ԿԲ մտածողությունն էր, որ սա կարող է գնաճի բերել: Այսօր մեր առաջ հրատապ խնդիր է իսկապես դրամի արժեզրկումը` միաժամանակ` մենաշնորհների վերացումը: Այս երկուսը իրար կկոմպենսացնեն, բայց կառավարությունը դա երբեք չի անի, որովհետև ԿԲ մտածողություն այն է, որ դրամի արժեզրկման դեպքում կարող է գնաճ լինել: Դատելով արդյունքներից` այսօր կառավարությունը իսկապես չգիտի` ինչ պետք է անել, կառավարության մոտ բացակայում է կանխատեսման կարողունակությունը»,- ասաց Վ.Օսկանյանը:
Դիտարկմանը, թե մոնոպոլիաները խորացել են հենց այն տարիներին, երբ ինքը իշխանության մեջ էր` Վ.Օսկանյանը պատասխանեց. «Ես այդ մտահոգությունից հոգնել եմ. ես ո՛չ վարչապետ եմ եղել, ո՛չ էկոնոմիկայի նախարար, ո՛չ էլ կոռուպցիոն ծառ եմ եղել»: