ՀՀ գազամատակարարման համակարգի գործունեությունն ուսումնասիրող ժամանակավոր հանձնաժողովը կհետաձգի իր միջանկյալ զեկույցի ներկայացումը: Այն նախատեսվում էր Ազգային ժողով ներկայացնել հունիսի 12-ին՝ վաղը: Հանձնաժողովի դաշնակցական անդամ Աղվան Վարդանյանը «Առաջին լրատվական»-ին տեղեկացրեց, որ իրենք չեն հասցրել ավարտել միջանկյալ զեկույցը, այդ պատճառով էլ այն վաղը չեն ներկայացնի խորհրդարանի դատին:
Հիշեցնենք, որ այդ հանձնաժողովը ստեղծվեց երեքուկես ամիս առաջ՝ «ՀայՌուսգազարդում» Հայաստանի ունեցած վերջին 20 տոկոսն էլ սպառած գազի պարտքի դիմաց ռուսական կողմին հանձնելու մասին ՀՀ իշխանությունների որոշումից հետո: Հանձնաժողովը ստեղծվեց ոչ իշխանական ուժերի պահանջի արդյունքում ու կոչվեց ուսումնասիրելու գազմատակարարման ոլորտի գործունեությունը՝ սկսած 2011-2013 թվականներին գազի դիմաց կուտակված պարտքի, գազի սակագնի ձևավորաման հարցերից մինչև «ՀայՌուսգազարդի» կանոնադրական կապիտալում Հայաստանի բաժնեմասի գնահատման խնդիրը:
Գազի հանձնաժողովն իր չորս ենթահանձնաժողովներով մոտ երեք ամիս ուսումնասիրել է այդ խնդիրներն ու միջանկյալ զեկույց պատրաստել: Ընդ որում` հանձնաժողովի գործունեության ավարտ է սահմանվել հինգերորդ գումարման Ազգային ժողովի հինգերորդ նստաշրջանի ավարտը, որը տեղի կունենա վաղը: Սակայն այն ևս երկու շաբաթ կհետաձգվի, քանի որ նախատեսվում է հրավիրել ԱԺ արտահերթ նիստ: Այնպես որ, գազի հանձնաժողովի գործունեությունը կշարունակվի մինչև հունիսի վերջ, իսկ դրանից հետո, ամենայն հավանականությամբ, այն կերկարաձգվի:
Ա. Վարդանյանի խոսքերով հանձնաժողովն այս ընթացքում չի հասցրել ամբողջապես ուսումնասիրել իր առջև դրված խնդիրները: