Հայաստանում է Լատվիայի գործատուների միության պատվիրակությունը, որն այսօր հանդիպում էր Հայաստանի գործատուների միության ու կառավարության ներկայացուցիչների հետ:
Լատվիական պատվիրակությունը Հայաստանում է այստեղի գործարար դաշտն ու հնարավոր ներդրումների հնարավորությունները ուսումնասիրելու նպատակով: ԵՄ անդամ Լատվիայի հետ Հայաստանի ապրանքաշրջանառությունը մեծ չէ՝ անցյալ տարի կազմել է 6.5 մլն դոլար:
«Առաջին լրատվական»-ի հետ զրույցում Լատվիայի գործատուների միության նախագահ Իմանթս Կանաշկան մեր հարցին՝ ի՞նչ է սպասվում հայ-լատվիական տնտեսական հարաբերություններին Հայաստանի՝ Մաքսային միություն մտնելուց հետո, ասաց. «Ես կարծում եմ՝ այնտեղ ևս կարող են լինել մեծ հնարավորություններ գործարարների համար, բայց պետք է մի քիչ հասկանալ այն պայմանները, որոնք կլինեն, երբ կայանա Մաքսային միությունը: Ես կարծում եմ՝ դա լավ կամուրջ կարող է լինել մեր գործարարների համար, որ նրանք ընկնեն այդ առևտրական տարածք: Կարծում եմ՝ դա շատ մեծ հնարավորություն է, որովհետև շատ մեծ շուկա է»:
Մեր դիտարկմանը, թե Հայաստանի՝ ՄՄ մտնելուց հետո գործելու են նոր մաքսատուրքեր, քանի որ Լատվիան ԵՄ անդամ է, դա չի՞ բարդացնի երկու երկրների հարաբերությունները, լատվիական պատվիրակության ղեկավարը պատասխանեց. «Նախ՝ պետք է հասկանալ խաղի պայմանները, որից հետո կարելի է հաշվարկել՝ եթե այդ բոլոր մաքսատուրքերից հետո մեր տվյալ ապրանքը մրցունակ լինի, այդ դեպքում համագործակցություն կլինի»:
Իմանթս Կանաշկայի խոսքերով՝ իրենց միությանն անդամակցում են Լատվիայի աշխատատեղերի 42%-ն ապահովող ընկերությունները: Ըստ նրա՝ իրենք Հայաստանում ուսումնասիրում են ոչ միայն տնտեսական, այլև մշակութային ու այլ կապեր, քանի որ առաջիկայում Լատվիան դառնալու է ԵՄ նախագահող երկիր:
Մանրամասները՝ տեսանյութում: