Երկարատև ծանր հիվանդությունից հետո Ֆրանսիայում մահացել է «Մեծն Տիգրան» աշխարհազորի կազմակերպության ղեկավար Սմբատ Այվազյանը, ով այս տարի մարտի 10-ին դարձավ 55 տարեկան: Նա եղել է ՀՀ ԳԽ և ԱԺ տարբեր գումարման պատգամավոր, զբաղեցրել է բարձր պաշտոններ: 2002թ. «Հանրապետություն» կուսակցության քաղխորհրդի անդամ է: 2008թ. համաժողովրդական շարժման անդամ էր: Նույն թվականին ազատազրկվեց և ազատ արձակվեց 2009թ. հունիսին: Դժվար է ծանր կորստին համակերպվելը, առավել ևս` նրան ճանաչողների ու զինակից ընկերների համար:
«Հանրապետություն» կուսակցության քաղխորհդի անդամ Լևոն Եղիազարյանը նշեց. «Այսօր շատ տխուր օր է ինձ համար, և շատ վատ եմ զգում, ու շատ դժվար եմ կարողանում խոսել մեր շատ սիրելի Սմբատի մասին: Սմբատին ճանաչում եմ 2000 թվականից` կուսակցության ստեղծման օրվանից: Աշխույժ, կենսախինդ, բարի, սկզբունքային, մեր շատ սիրելի Սմբոն` ինչպես մտերմիկ ասում էինք մենք: Եվ հիմա անհավատալի է, որ Սմբատը չկա: Սմբատը չկա ու թափով չի մտնի գրասենյակ, բոլորիս բարևի ու ասի` տղերք, ոնց եք, ոնց ենք անելու: Հիշում եմ մի դեպք, երբ նստած էր որպես քաղբանտարկյալ. գնացի իրենց տուն, Սմբատի մայրը` Հայաստան մայրիկը, հիվանդ էր, խաբեցի, հարցազրույց վերցրի «Ժամանակ» թերթի համար: Սրտաճմլիկ էր ստացվել հարցազրույցը, Սմբոն (1.00) զանգեց, ասաց` այս ինչ ես գրել, բոլորին լացացնում ես, թափով, դուխով գրի, չպետք է լացել, չպետք է չարչարվել, պետք է առաջ գնալ: Ու ես հուսով եմ, որ Սմբատի գործը մենք շարունակելու ենք, երկիր ենք սարքելու, Սմբատը շատ էր ուզում տեսնել երկիրը երկիր դարձած: Ի խորոց սրտի` ցավակցում եմ Սմբատի հարազատներին, իմ ընկերներին, «Տիգրան Մեծի» տղաներին, բոլորիս, հայ ժողովրդին այս մեծ ու անդառնալի կորստի համար: Ողորմի դժվար է ասել: Սմբատ, դու մեզ հետ ես»: