Ոստիկանության պետական պահպանության գլխավոր վարչությունում առաջիկայում կառուցվածքային փոփոխություններ են սպասվում: Վարչության տարածքային, մարզային բաժինները ապակենտրոնացվելու են և գործելու են ոստիկանության բաժինների ենթակայությամբ: Այսինքն՝ այլևս նախկին կենտրոնացված, մեկ միասնական վարչությունը չի լինելու, որը ենթարկվում էր միայն վարչության պետին ու ոստիկանապետին: Այսուհետ բաժանմունքները ենթարկվելու են ոստիկանության տարածքային բաժիններին:
«Առաջին լրատվական»,-ը արդեն իսկ գրել է, որ նմանօրինակ կառուցվածքային փոփոխություն լինելու է նաև ոստիկանության անձնագրային և վիզաների վարչությունում: Նույն կերպ, անձնագրային բաժանմունքներն առանձնացվելու են և գործելու են ոստիկանության տարածքային բաժինների ենթակայությամբ:
Պետական պահպանության վարչության տրոհումը նշանակում է, որ «ամենակարող» ՊՊԳՎ-ի պետ Ռոմիկ Մկրտումյանի դիրքերը թուլանալու են, և նա չի կարող առաջվա պես «հզոր» լինել ու հարցեր լուծել: «Արդյոք այս փոփոխությամբ Ձեր դիրքերի թուլացո՞ւմ է նշանակում»՝ հարցրինք Մկրտումյանից: Նա, սակայն, հրաժարվեց պատասխանել որևէ հարցի, ասաց, որ ինքը դեռ տեղյակ էլ չի, որ նման փոփոխություն է նախատեսվում:
Նշենք, որ Ռոմիկ Մկրտումյանը հենց այս ծառայությունը ղեկավարելու շնորհիվ է ահռելի հարստություն դիզել: Նա միայն Նոր Արեշ թաղամասում հսկայական, սեփական գազանանոցով շքեղ առանձնատուն ունի և մի քանի ավտոմեքենա, որոնց արժեքը գերազանցում է հարյուր հազարավոր դոլարները: Դրան զուգահեռ, Մկրտումյանի գլխին մշտապես մութ ամպեր են կուտակվում: Միայն մամուլի հրապարակումների համաձայն՝ նա վերջին շրջանում ոստիկանապետի կողմից նկատողություն, զգուշացումներ է ստացել, և նա կանգնած է աշխատանքը կորցնելու եզրին: Բայց Ոստիկանապետ Վլադիմիր Գասպարյանը, չգիտես ինչու, դեռևս հապաղում է ազատվել Մկրտումյանից: Թեև չի բացառվում, որ պետական պահպանության վարչությունը, կառուցվածքային փոփոխություններից բացի, նաև կադրային փոփոխությունների ենթարկվի: