Նոյեմբերի 15-18-ն անցկացվելու է «Հայաստան» հիմնադրամի երկրորդ խոշոր դրամահավաք–միջոցառումը` համաեվրոպական հեռախոսամարաթոնը: Հիմնադրամի գործադիր տնօրեն Արա Վարդանյանը Հանրային հեռուստաընկերության «Հարցազրույց» հաղորդման եթերում ասել է, որ հիմնադրամը Երևանի և ողջ աշխարհում գտնվող 20 գրասենյակների հասցեներին ամեն օր ստանում է տարբեր ծրագրերի վերաբերյալ աջակցության խնդրանքներ, ուսումնասիրում է դրանք և տալիս իր դրական կամ բացասական պատասխանը:
Բացի ճաշկերույթներից, հեռախոսամարաթոնից և հեռուստամարաթոնից, տարվա ընթացքում որոշ բարերարներ իրենք են գումարներ հատկացնում հատուկ որոշ նպատակների համար: Արա Վարդանյանը նշել է, որ ամեն տարի նույն բարերարներից խոշոր գումարային նվիրատվություն իրենք չեն ակնկալում. «Պարոն Էդուարդո Էռնեկյանն անցած տարի շուրջ 12 միլիոն դոլար նվիրաբերեց, բայց այս տարի չենք կարող նույնը սպասել: Նույնը վերաբերում է այլ բարերարներին ևս»:
Հիմնադրամի գործադիր տնօրենը նշել է, որ նոյեմբերի 8-ին Մոսկվայում տեղի ունեցած դրամահավաք-ճաշկերույթում հավաքվել է 12 միլիոն դոլար, որից միայն 4 և 4,5 միլիոնը հատկացրել են երկու բարերարներ:
«Գումարների հավաքագրման վիճակագրությամբ սովորաբար առաջինը Մոսկվան է, երկրորդը՝ Հայաստանը, ապա՝ Եվրոպան, հետո՝ ԱՄՆ-ը: Ժամանակին ԱՄՆ-ում կային շատ բարերարներ, որոնք ամեն տարի մեկ կամ կես միլիոն էին ուղարկում: Նրանց մի մասը մահացել է մյուս մասն էլ խնդրել է չդիմել, ուստի մենք հասարակության վրա ենք աշխատում»,- ասել է Արա Վարդանյանը՝ հավելելով, որ պատճառը կասկածը չէ:
Այս տարի հավաքագրվելիք գումարների 10 տոկոսը, ինչպես նախօրոք հայտարարվել է, տրամադրվելու է սիրիահայերին: Բանախոսը նշել է, որ ԱՄՆ-ում հավաքված գումարները չեն կարող ուղարկել Սիրիա։ «ԱՄՆ-ից ուղարկվածները պետք է ծախսվեն միայն Հայաստանում և ԼՂՀ-ում»,- ասել է նա՝ դա հիմնավորելով որոշ պարտավորություններով: Սակայն, ըստ Վարդանյանի, դրանք կարող են ծախսվել Հայաստանում և ԼՂՀ-ում բնակվող սիրիահայերի խնդիրների լուծման համար:
«Հայաստան» համահայկական հիմնադրամի գործադիր տնօրենը նշել է, որ սա միակ հայկական բարեգործական կառույցն է, որը միջազգային աուդիտ է անցնում, և շատ խիստ ստուգվում է յուրաքանչյուր ծրագրի կատարումը:
