Մարտի 17-ին ՀՀ ոստիկանության պետ, ոստիկանության գեներալ-լեյտենանտ Ալիկ Սարգսյանն ընդունեց ԵԽԽՎ Մոնիտորինգի հանձնաժողովի Հայաստանի հարցով համազեկուցողներ Ջոն Պրեսկոտին և Աքսել Ֆիշերին, քարտուղար Բաս Քլայնին և նրանց ուղեկցող անձանց:
Ալիկ Սարգսյանը ներկայացրեց ոստիկանությունում իրականացվող բարեփոխումների ոլորտները, ձեռքբերումները և առաջիկա խնդիրները:
Ոստիկանության պետը հատկապես կարևորեց օրենսդրական դաշտի բարեփոխումները, որոնք հնարավորություն են տվել ոստիկանության գործառույթները զգալի չափով համապատասխանեցնել եվրոպական ու միջազգային չափանիշներին:
Հյուրերը դրական գնահատեցին ՀՀ ոստիկանության բարեփոխումների ծրագրի կատարման ընթացքը` միևնույն ժամանակ նշելով, որ բարեփոխումները պետք է իրականացվեն ողջ ծավալով և նախատեսված ժամկետում` անշրջելի դարձնելով ոստիկանական համակարգի արդիականացման գործընթացը:
ՀՀ ոստիկանության պետ Ալիկ Սարգսյանը պատասխանեց ԵԽԽՎ պատվիրակությանը հետաքրքրող հարցերին:
Կողմերը հույս հայտնեցին, որ ՀՀ ոստիկանության արդյունավետ համագործակցությունը ինչպես եվրոպական, այնպես էլ միջազգային կառույցների հետ առաջիկայում ավելի կխորանա` ամուր հիմք դառնալով ոստիկանական համակարգի արմատական վերափոխման, գործունեության մեթոդների արդիականացման և իրավապահ գործառույթների լիարժեք իրականացման համար: