Նոյեմբերի 14-ին ԱԺ Կանաչ սրահում բացվել է լուսանկարչուհի Ազատուհի Մնացականյանի անհատական ցուցահանդեսը:
Ազատուհի Մնացականյանը լուսանկարիչ-դիզայներ է, «Նորեոն» ստեղծագործական կենտրոնի, դիզայներների միջազգային միության, ինչպես նաև Հայաստանի դիզայներների միության անդամ: Ստացել է բազմաթիվ մրցանակներ ինչպես Հայաստանում, այնպես էլ արտերկրում:
ԱԺ գիտության, կրթության, մշակույթի, երիտասարդության և սպորտի մշտական հանձնաժողովի նախագահ Արտակ Դավթյանը ներկայացրել է երիտասարդ լուսանկարչուհու ֆոտոցուցահանդեսը՝ բարձր գնահատելով նրա ստեղծագործությունները:
Պատգամավորն ընթերցել է ԱԺ նախագահ Հովիկ Աբրահամյանին ուղղված Ազատուհի Մնացականյանի նամակը, որտեղ նա երախտագիտություն էր հայտնում ԱԺ նախագահին իր ստեղծագործություններն ուշադրության արժանացնելու և ԱԺ ցուցասրահում դրանք ներկայացնելու առաջարկն ընդունելու համար: Լուսանկարչուհին նշում է, որ ինքը ցուցադրության պատրաստ աշխատանքներ ունի, որոնք արտասահմանում և Հայաստանում մրցանակներ են ստացել, բայց ինքը նախընտրում է տպագրել և ԱԺ ցուցասրահում ներկայացնել հայ արվեստի երախտավորներին նվիրված լուսանկարների շարքը:
Ազատուհի Մնացականյանը, շնորհակալություն հայտնելով ԱԺ նախագահ Հովիկ Աբրահամյանին, ասել է, որ նա առաջինն էր, ով արձագանքել է իր նամակին: Լուսանկարչուհին տեղեկացրել է, որ երեք տարի այցելել է հայ անվանի մարդկանց արվեստանոցներ, բնական, աշխատանքային վիճակում լուսանկարել նրանց, որ սերունդները միշտ հիշեն մնայուն արժեքներ ստեղծող հայ երախտավորներին:
Ազատուհին հյուրերին ներկայացրել է նաև այն լուսանկարը, որը՝ որպես լավագույն փորձարարական աշխատանք, վերջերս ոսկե մեդալ է ստացել Տաշքենդի Բիենալեում:
Լուսանկարչուհին տեղեկացրել է, որ Տաշքենդի Բիենալեում ինքը ներկայացրել էր չորս պատմություն: Ընտրվել է լուսանկարներից մեկը, որը կոչվում է «Ազատազրկում»: Այդ մրցանակը նա համարեց նաև Հայաստանինը: «Մեծ հաղթանակ է, երբ լուսանկարդ հայտնվում է մի այնպիսի վայրում, որտեղ ներկայացված են նաև թուրք և ադրբեջանցի լուսանկարիչների գործերը, և հաղթում ես դու»,- ասել է Ազատուհի Մնացականյանը:
