«Հայկական աստղագիտություն» ընկերության համանախագահ Արեգ Միքայելյանը անդրադառնալով երեկ տեղի ունեցած արեգակի խավարմանը` նշեց, որ այն հատկապես հետաքրքրական էր ամսաթվերի առումով:
«Նոյեմբերի 13-ին և մասամբ 14-ին տեղի ունեցավ արեգակի խավարում, որն ավելի շատ Խաղաղ օվկիանոսի վրա էր ընկնում: Խավարումը սկսվեց նոյեմբերի 14-ին, ավարտվեց 13-ին, որովհետև Խաղաղ օվկիանոսի մեջտեղում կա ամսաթվի փոփոխման գիծ. այդ գծից դեպի արևմուտք մեկ օր առաջ է, դեպի արևելք` մեկ օր հետո»,- ասաց Արեգ Միքայելյանը: Նրա խոսքով` քանի որ խավարումը սկսվում է արևմուտքից և տեղաշարժվում դեպի արևելք, ընկել է նախորդ օրվա մեջ: Այսինքն` արևի խավարումը Ավստրալիայում սկսվեց նոյեմբերի 14-ին, ավարտվեց 13-ին` Չիլիի կղզիների վրա, Հարավային Ամերիկայի կողմերում:
Արեգ Միքայելյանի համոզմամբ` արեգակի խավարումը աստղագետները կարող են ճշգրտորեն հաշվարկել:
2013-ին արևի երկու խավարում է սպասվում` մայիսի 10-ին և նոյեմբերի 3-ին: