Ուռուցքաբանության ազգային կենտրոնը ներդրումային ծավալների սպառման պատճառով նոր հիվանդներ չի կարողանում ընդունել: Այս մասին այսօր լրագրողների հետ հանդիպման ժամանակ ասաց Ուռուցքաբանության ազգային կենտրոնի Մանկական ուռուցքաբանության բաժանմունքի ղեկավար Գրիգոր Բադալյանը՝ խոսելով Հայաստանում մանկական քաղցկեղի տարածվածության և ոլորտի հիմնախնդիրների շուրջ:
Բանախոսը վերահաստատեց, որ ամբողջ աշխարհում քաղցկեղ հիվանդությունը շարունակում է մնալ ամենադժվար բուժվող հիվանդություններից մեկը, այն հիվանդություններից մեկը, որից մահացության ցուցանիշը երկրորդն է՝ սրտանոթային հիվանդություններից հետո: Նա նաև ասաց, որ քաղցկեղ հիվանդության աճ զգացվում է ամբողջ աշխարհում, բայց էպիդեմիկ տեմպեր չունի, երեխաների շրջանում վերջին տասը տարում չի նկատվում թվաքանակի փոփոխություն:
«Խնդիրները ոչ թե աճի տեմպերի մեջ են, այլ նրա, թե ինչ կարող ենք անել մեր հանրապետությունում: Այսօր ես կարծում եմ, որ դժվար շրջաններից մեկն է մեր առողջապահության համար, քանի որ այդ բուժումը ամենաթանկ բուժումներից է, երկրների մեծ մասում կառավարությունն է իր վրա վերցնում բուժման ծախսերը կամ ապահովագրական կազմակերպությունները: Մեզ մոտ երկրորդը դեռ զարգացած չէ, իսկ ինչ վերաբերում է պետական ներդրումներին, դա բավարար չէ, որ մենք անցկացնենք ժամանակակակից բուժում:
Կանգնել ենք վտանգի առաջ, որ կենտրոնը հիվանդներ չի կարողանում ընդունել, որովհետև ներդրումային ծավալներն ավարտվել են, և մենք լուրջ խնդիրներ ունենք այս պահին»,- տեղեկացրեց Գրիգոր Բադալյանը՝ շարունակելով, որ, օրինակ, ոսկրային ուռուցքի՝ սարկոմաների կոմպլեքս բուժումը կազմում է հարյուր հազար եվրո, բուժումը տևում է ամիսներ, գուցե՝ մեկ տարի:
Ըստ նրա՝ կենտրոնում անվճար բուժումն իրականացվում էր պետպատվերի սահմաններում, սակայն հոկտեմբերի 1-ից մտել է համավճար վիրահատության և այլ բուժումների համար, որը, նրա փաստմամբ, մեծ գումար է կազմում:
«Եթե վիրահատական եղանակով բուժման համավճարին կարողանում են մասնակցել, իսկ քիմիաթերապիայի դեպքում ոչ մի հայկական ընտանիք չի կարող մասնակցել այդ համավճարին՝ մինչև երեք հարյուր հազար դրամ միայն դեղորայքի վճարը կլինի:
Մեր տնօրինությունը, բացառության կարգով, այդ երեխաներին կարողանում է ապահովել նույն տեմպով, ինչ մինչ այս: Սակայն նոր հիվանդները չեն ընդունվում նույնիսկ համավճարը մուծելու պատրաստակամության դեպքում, քանի որ պետք է պետպատվերի գումարը ստանան և նոր մասնակցեն համավճարին: Մեր տնօրինությունն ամեն օր այդ խնդիրներով քննարկումներ է անցկացնում նախարարությունում»,- պարզաբանեց բանախոսը: