Այսօր՝ նոյեմբերի 14-ին, ավտովթար է տեղի ունեցել Արագածոտնի մարզում: Ժամը 00:10-ի սահմաններում, «ԲՄՎ 520» մակնիշի 77 QQ 755 համարանիշի ավտոմեքենայի վարորդը Երևան-Վանաձոր ավտոճանապարհի 20-րդ կմ հատվածում, Աշտարակի կամրջի մոտ, դուրս է եկել ճանապարհի երթևեկելի գոտուց և բախվել երկաթե արգելապատնեշներին: Հարվածից ավտոմեքենայի շարժիչն ու տեղադրված գազի բալոնը մոտ 50 մետր դուրս էին շպրտվել:
Ինչպես հայտնում է shamshyan.com-ը, վթարի հետևանքով 1 հոգի մահացել է և 1 հոգի տեղափոխվել է Աշտարակի բժշկական կենտրոն: Մահացածին և վիրավորին ավտոմեքենայից դուրս են բերել քաղաքացիները, ՀՀ արտակարգ իրավիճակների նախարարության փրկարար ծառայության Աշտարակի հրշեջ փրկարարների խումբը և Ճանապարհային ոստիկանության 2-րդ սպայական գումարտակի 2-րդ վաշտի ծառայողները:
Դեպքի վայր են ժամանել Ճանապարհային ոստիկանության 2-րդ սպայական գումարտակի հրամանատար, ոստիկանության փոխգնդապետ Արսեն Արշակյանը, ՀՀ ԱԻՆ փրկարարական ծառայության օպերատիվ վարչության պետ Արման Ցոլակյանը և Ոստիկանության քննչական գլխավոր վարչության Արագածոտնի մարզի քննչական բաժնի պետ Մարատ Դուրյանը:
Այս պահին Ոստիկանության Աշտարակի բաժնի օպերատիվ քննչական խումբը փորձում է պարզել մահացած անձի և վիրավորի ինքնությունները, ինչպես նաև՝ թե ով է եղել վարորդը:
shamshyan.com-ը հայտնում է, որ ավտոմեքենայում հայտնաբերվել է հրազեն, որը քննիչի կողմից առգրավվել է: