Վաղը Ուկրաինայի նորընտիր նախագահ Պյոտր Պորոշենկոյի երդմնակալության արարողությանը Հայաստանը կներկայանա նախարարի մակարդակով: Կիևում նորընտիր նախագահի երդմնակալությանը կմասնակցի ՀՀ ԿԳ նախարար Արմեն Աշոտյանի ղեկավարած պատվիրակությունը: Այս մասին քիչ առաջ «Առաջին լրատվական»-ի հետ զրույցում տեղեկացրեց ՀՀ ԱԳՆ մամլո խոսնակ Տիգրան Բալայանը: Նա նշեց, որ Հայաստանը մասնակցելու է նախարարի ղեկավարած պատվիրակությամբ, իսկ թե պատվիրակության կազմում ովքեր են ընդգրկված՝ խոսնակը չմանրամասնեց՝ դա կարևոր չհամարելով:
Հիշեցնենք, որ ՀՀ նախագահ Սերժ Սարգսյանի՝ Պյոտր Պորոշենկոյին ուղղված շնորհավորական ուղերձից հետո Հայաստան վերադարձավ ՀՀ-ում Ուկրաինայի դեսպան Իվան Կուխտան: Երևանում տված իր հարցազրույցներում Իվան Կուխտան հույս էր հայտնել, որ Հայաստանը կընդունի Ուկրաինայի ուղարկած հրավերը և կմասնակցի Պորոշենկոյի երդմնակալությանը բարձր մակարդակով: Նա հայտնել էր Ուկրաինայի իշխանությունների՝ Հայաստանի հետ խոր քաղաքական ու տնտեսական հարաբերություններ հաստատելու ցանկությունը: