Այսօր ամբողջ աշխարհում նշվեց Կույրերի միջազգային օրը: Հայաստանում այս տեսակի հաշմանդամություն ունեցող մարդկանց համար գործում է «Կույրերի միավորում» հասարակական կազմակերպությունը: «Առաջին լրատվական»-ի հետ զրույցում կազմակերպության աշխատակից Բոյաջյանը նշեց, որ իրենց կազմակերպությունը հնարավորության սահամաններում անում է ամեն ինչ՝ կույրերին օգնելու համար. «Տարիքային տարբեր խմբերի մարդիկ կան մեզ մոտ: Միավորմանն անդամակցում են Հայաստանի Հանրապետության տարածքում բնակվող տեսողությունից առաջին և երկրորդ խմբի շուրջ 2013 հաշմանդամներ, որոնք հաշվառված են կույրերի 9 վարչությունների 48 սկզբնական կազմակերպություններում:
Հայաստանի «Կույրերի միավորոումն» իր կանոնադրական խնդիրների կատարումն ապահովելու նպատակով հիմնադրել է արտադրական գործունեությամբ զբաղվող 10 սահմանափակ պատասխանատվությամբ ընկերություններ, որոնք տեղաբաշխված են ինչպես Երևանում, այնպես էլ Հայաստանի Հանրապետության մյուս քաղաքներում` Գյումրիում, Վանաձորում, Սևանում, Աշտարակում, Արմավիրում, Էջմիածնում, Արտաշատում, Կապանում։ Դրանք հիմնականում զբաղված են էլեկտրատեխնիկական նշանակության, խոզանակ-վրձինների, ստվարաթղթե և կարի արտադրատեսակների թողարկմամբ:
Միավորման ՍՊ ընկերություններում ամեն տարի անցկացվում են շախմատի և 64 վանդականոց շաշկիի տեղական և հանրապետական նշանակության անհատական առաջնություններ, իսկ հավաքական թիմերը մասնակցում են նաև միջազգային մրցաշարերի»:
Բոյաջյանը նշեց նաև, որ իրենց կազմակերպությունից զատ, Հայաստանում կույրերի համար գործում է նաև Նիկողայոս Տիգրանյանի անվան հատուկ դպրոցը, ուր հաճախում են տարբեր տարիքիի աշակերտներ:
Այն հարցին, թե որքան թոշակ են ստանում կույրերն ամսական, Բոյաջյանը պատասխանեց, որ դա կախված է կուրության աստիճանից. «Հատուկ «կույրերի թոշակ» հասկացողություն չկա, նրանք համարվում են հաշմանդամ, ուղղակի այստեղ հարցն այն է, թե որ կարգի հաշմանդամ են: Դա էլ որոշվում է հատուկ բժշկական ստուգումներից հետո»։