Hyetert-ի (Հայ թերթ) փոխանցմամբ, թուրքական 4 կուսակցություններ հունիսի 12-ին կայանալիք խորհրդարանական ընտրություններից առաջ իրենց ցուցակներում շարունակում են ներառել հայ թեկնածուներին.
«Քրդական Խաղաղություն և ժողովրդավարություն կուսակցությունը (ԽԺԿ) պատրաստվում է Ստամբուլի 2-րդ ընտրատեղամասից առաջադրել հայ թեկնածուի (ամենայն հավանականությամբ, դա կլինի հայ գրող և լրագրող Հայկո Բաղդատը): Բացի այդ, նրա ուշադրության կենտրոնում է հայտնվել ծագումով Արտվինից, հայազգի Իսմեթ Շահինը:
Իշխող Արդարություն և զարգացում կուսակցությունն (ԱԶԿ) իր հերթին առաջադրելու է Մելքոն Քարաքյոսեին և Հերման Բալյանին, իսկ գլխավոր ընդդիմադիր ուժ հանդիսացող Ժողովրդա-հանրապետական կուսակցություը (ԺՀԿ)` Արև Ջեբեջիին: Ուշագրավ է, որ իր հակահայկական հայացքներով ամենից շատ հայտնի Ազգայնական շարժում կուսակցությունը նույնպես ունի հայ թեկնածու` Գեղամ Կարապետյան:
Նշվում է, որ Սուրբ Փրկիչ հայկական հիվանդանոցի հիմնադրամի նախագահ Պետրոս Շիրինօղլուն սպասում է հրավերի իշխող կուսակցությունից»:
Հիշեցնենք, որ փետրվարին թուրքական Zaman թերթը գրեց, որ հայ թեկնածուների քանակը հասել է 8-ի, որոնցից 5-ը ներկայացնում են ԱԶԿ-ն, և մեկական հայ թեկնածու ունեն ԺՀԿ-ն, ԱՇԿ-ն ու ԽԺԿ-ն:
Ինչևէ, այս տարի մեծ հնարավորություններ կան, որ 45-ամյա ընդմիջումից հետո Թուրքիայի հայ համայնքի ներկայացուցիչը կարող է հայտնվել թուրքական խորհրդարանում:
