Ըստ ռուսական «Կոմերսանտ»-ի՝ Վրացպատենտը նամակ է ուղարկել Ռոսպատենտին, որում պահանջում է դաղստանյան ЦКНИИ ֆիրմային չտրամադրել 18 վրացական հայտնի գինիների գրանցումը: Ներկայումս գործող՝ վրացական գինիների Ռուսաստան արտահանման արգելքի պայմաններում նման գրանցման առկայությունը թույլ կտա այդ գինու տեսակների արտադրությունն իրականացնել Դաղստանում, ինչը վրացական կողմը համարում է իր գինի արտադրողների իրավունքների խախտում:
Ինչպես ավելի վաղ էր հաղորդվում, դաղստանյան ЦКНИИ-ն Ռոսպատենտին 18 ապրանքանիշների գրանցման հայտ է ներկայացրել ` վրացական հայտնի գինիների անվանումներով, որոնց թվում են հայտնվել «Կինձմարաուլի», «Խվանչկարա», «Ցինանդալի», «Մուկուզանի» և այլ անվանումներ:
Վրացպատենտի տնօրեն Իրակլի Գվալաձեի պնդմամբ, վերոնշյալ գինու տեսակների արտադրության էքսկլյուզիվ իրավունքը պատկանում է միայն Վրաստանին: Նա նշել է նաև, որ նման դեպք նախկինում էլ է տեղի ունեցել, սակայն Ռոսպատենտն այն ժամանակ թույլ չի տվել:
