Timeturk-ի հաղորդմամբ, թուրքական իշխանությունները հերքել են, որ Դիարբեքիրում իջեցված իրանական բեռնատար օդանավում գտնվել է միջուկային զենք կամ արգելված միջուկային սարքավորում:
Այս մասին հայտարարել է արտգործնախարարության ներկայացուցիչ Սելչուկ Ունալը, որը հերքել է այն տեղեկատվությունը, թե իրանական բեռնատար օդանավն արտակարգ պայմաններում իջեցվել է Դիարբեքիրի օդանավակայանում, և որ այդ գործընթացին մասնակցել են թուրքական ռազմաօդային ուժերի կործանիչները. «Թուրքիայի օդային տարածքով թռչող իրանական բեռնատար օդանավերի համար գոյություն ունի ստանդարտ կարգ, ըստ որի` նախատեսված են դրանց չպլանավորված վայրէջքներն ու խուզարկումը: Օդանավում կատարված խուզարկության արդյունքում կասկածելի ոչինչ չի հայտնաբերվել, որից հետո իրանական օդանավը մեկնել է Սիրիա»:
Հիշեցնենք, որ երեկ թուրքական լրատվամիջոցները տեղեկատվություն տարածեցին, թե երբ թուրքական զինված ուժերը տեղեկացվել են թուրքական օդային տարածքով թռչող իրանական բեռնատար օդանավում կասկածելի բեռի առկայության մասին, անմիջապես օդ են բարձրացրել երկու F-16 տիպի կործանիչների և իրանական օդանավին ստիպել հարկադիր վայրէջք կատարել Դիարբեքիրում:
Հատկանշական է, որ դրանից առաջ էլ Իսրայելի զինված ուժերի մամլո ծառայությունը հայտնել էր, որ իրենց կողմից Միջերկրական ծովում կանգնեցված և Սիրիայից թուրքական Մերսին նավահանգստի միջով դեպի Եգիպտոս ուղևորվող «Վիկտորիա» բեռնանավում հայտնաբերվել էր 6 հականավային հրթիռ` իր ռադարներով ու արձակման սարքերով, 2500 ականանետային արկ և «Կալաշնիկով» տիպի ինքնաձիգի ավելի քան 60.000 փամփուշտ: Իսրայելի վարչապետ Բենիամին Նեթանյահուն հայտարարել էր, որ զենքերը եղել են իրանական ծագման: