Կողոպտիչներից պաշտպանված չէ նաև Լոնդոնի բնակիչների երբեմնի սարսափ, հռչակավոր Թաուեր ամրոցը, որը գտնվում է Մեծ Բրիտանիայի մայրաքաղաքի կենտրոնում: Ինչպես հաղորդել է բրիտանական «Սան» թերթը, Թաուեր ամրոց, որտեղ պահվում են Մեծ Բրիտանիայի թագավորական իշխանության բարձրագույն խորհրդանիշները, ներառյալ՝ թագը, ինչպես նաև ալմաստի գանձարանը, գողեր են մտել։
«Չարագործները մագլցելով անցել են ամրոցի բարձր դարպասների վրայով և հատուկ երկաթե արկղից հափշտակել ամրոցի բոլոր բանալիները»,- գրում է պարբերականը:
Թաուերի պահակախումբը՝ հռչակավոր բիվիթերները, տեսել են գողերին, սակայն չեն շարժվել իրենց տեղերից, քանի որ դարավոր ավանդույթի համաձայն՝ նրանք չեն կարող հեռանալ իրենց հատկացված տեղից:
Հանցագործները փախուստի են դիմել այն բանից հետո, երբ դեպի վայր են ժամանել ոստիկանության աշխատակիցները։
Թաուերի ղեկավարությունը շտապ կարգով փոխել է բոլոր դռների կողպեքները, ինչի վրա զգալի գումար է ծախսվել:
Ինչպես հայտարարել են իշխանությունները «թագավորական գանձարանում պահվող պետական թագի և միապետական իշխանության մյուս խորհրդանիշների համար ոչ մի սպառնալիք չկա»: Միաժամանակ, Թաուերի ներկայացուցիչը հայտնել է, որ «որոշում է կայացվել վերանայել արտակարգ իրավիճակներում, ինչպիսին, օրինակ, գողերի ներթափանցումն է ամրոցի տարածք, Թաուերի աշխատակիցների գործողությունների կանոնները»:
