Ռուսաստանի վարչապետական ապարատի ինտերնետային կայքի փոխանցմամբ, վարչապետ Էրդողանը հանդիպում է ունեցել իր ռուս գործընկեր Վլադիմիր Պուտինի հետ: Ընդհանուր առմամբ հանդիպումը տևել է 2 ժամ 20 րոպե:
Հանդիպման առաջին ժամին ներկա են գտնվել նաև նրանց պատվիրակությունները, իսկ մնացյալ 1 ժամ 20 րոպեի ընթացքում Էրդողանն ու Պուտինը միայնակ են զրուցել:
Հանդիպման ժամանակ Պուտինը նշել է. «Երկու երկրների հարաբերությունները բավականին արագ են զարգանում` չնայած համաշխարհային տնտեսությունում առկա բոլոր դժվարություններին: Նախորդ տարի երկու երկրների միջև ապրանքաշրջանառությունը գրեթե 30-տոկոսանոց աճ է արձանագրել: Ես առաջընթաց եմ նկատում էներգետիկ (ատոմային էներգիա, ածխաջրածիններ), տրանսպորտային, ենթակառուցվածքային ոլորտներում խոշոր նախագծեր իրականացնելու հարցում:
Այս տարի մենք նշում ենք երկու երկրների միջև ստորագրված բարեկամության ու համագործակցության պայմանագրի 90-ամյակը: Մենք բոլոր հնարավորություններն ունենք ավելացնելու այն ամենը, ինչ արվել է վերջին մի քանի տարիների ընթացքում: Դա, մասնավորապես, վերաբերում է երկու երկրների հասարակ քաղաքացիների և բիզնեսի ներկայացուցիչների շփումների հեշտացմանը»:
Էրդողանն իր հերթին նույնպես ընդգծել է, որ, չնայած համաշխարհային ֆինանսական ճգնաժամի հետևանքներին, երկու երկրներին հաջողվել է առևտրա-տնտեսական ոլորտում լավ արդյունքներ արձանագրել. ապրանքաշրջանառությունը կազմել է 26.5 միլիարդ ամերիկյան դոլար.
«Ես համոզված եմ, որ թե´ Թուրքիան, թե´ Ռուսաստանն օժտված են կամքով` այդ ցուցանիշը 100 միլիարդ դոլարի հասցնելու համար: Էներգետիկ ոլորտում համագործակցելիս մեզ համար առաջնահերթ է համարվում ատոմակայանի կառուցման նախագծին ձեռնամուխ լինելը: Ես կարծում եմ, որ ապրիլի վերջին կամ մայիսի սկզբին մենք կդնենք այդ կոմպլեքսի հիմքը: Բնապահպանները մեզ շատ են քննադատում այդ հարցում, սակայն մենք վստահ ենք, որ ատոմակայանի կառուցման համար շատ ճիշտ վայր ենք ընտրել, լավ նախագիծ ենք մշակել և բարեհաջող կերպ շահագործման կհանձնենք այն»: