Հայոց ցեղասպանության 100-րդ տարելիցի խորհրդանիշն է լինելու անմոռուկ ծաղիկը: Այդ մասին Հայոց ցեղասպանության տարելիցին նվիրված միջոցառումները համակարգող պետական հանձնաժողովի 4-րդ նիստից հետո լրագրողներին հայտնել է ՀՀ նախագահի աշխատակազմի ղեկավար Վիգեն Սարգսյանը:
Անմոռուկը հիշելու և հիշեցնելու խորհուրդ ունի: Խորհրդանիշի վրա գրաֆիկայի միջոցով պատկերված են Ծիծեռնակաբերդի 12 սյուները` վերևից: Ծաղկի հինգ թերթիկները խորհրդանշում են այն 5 մայրցամաքները, որտեղ հայտնվել են Ցեղասպանությունից փրկված հայերը և ստեղծել հայկական գաղթօջախներ:
Պետք է հիշեցնել, սակայն, որ այս ամենից զատ, անմոռուկը դեռևս 1926 թվականին Գերմանիայում եղել է և մինչև այսօր էլ մասոնների խորհրդանիշն է: Նշանակում է չմոռանալ աղքատներին և հուսալքվածներին, զբաղվել բարեգործությամբ:
Այդ խորհրդանիշը ծագել է այն բանից հետո, երբ ֆաշիստները Գերմանիայում իրենց ձեռքը վերցրեցին իշխանությունը, ի հիշատակ այն մասոնների, որոնք զոհվել են համակենտրոնացման ճամբարներում․ այդ ժամանակաշրջանից ի վեր մասոնները սկսեցին անմոռուկներ կրել իրենց վերևի գրպանում: Այդ օրինակին հետևեցին նաև անգլիական մասոնները, որոնց մոտ անմոռուկը դարձել էր ավելի շուտ հիշատակի խորհրդանիշ․ մարդը գնացել է, բայց մոռացված չէ:
