Թուրքական TRT Haber հեռուստաալիքի փոխանցմամբ` Թուրքիայի Ազգային մեծ ժողովը (ԹԱՄԺ) ընդունել է «13 մեծ քաղաքների» մասին օրինագիծը: Վերջինիս համաձայն՝ Այդընը, Բալըքեսիրը, Դենիզլին, Հաթայը, Մալաթիան, Մանիսան, Քահրամանմարաշը, Մարդինը, Մուղլան, Թեքիրդաղը, Տրապիզոնը, Շանլըուրֆան և Վանը ճանաչվել են մեծ քաղաքներ: Դրա համար պահանջվում էր, որ նրանք ունենան ավելի քան 750,000 բնակչություն:
Միևնույն ժամանակ մեծ քաղաքներ Ադանայի, Անկարայի, Անթալիայի, Բուրսայի, Դիարբեքիրի, Էսքիշեհիրի, Էրզրումի, Գազիանթեփի, Իզմիրի, Քայսերիի, Քոնիայի, Մերսինի, Սաքարիայի ու Սամսունի սահմանները ճանաչվել են որպես նահանգի սահմաններ, որոնցով վերջ է տրվում այդ քաղաքներին հարող շրջանների գյուղերի ու քաղաքների իրավական կարգավիճակին, գյուղերը վերածվելու են այդ քաղաքների թաղամասերի:
Հիշեցնենք, որ Թուրքիայի վարչապետ Ռեջեփ Էրդողանը մեծ կարևորություն է տալիս 2014 թվականի մարտին կայանալիք տեղական ինքնակառավարման մարմինների (ՏԻՄ) ընտրություններին, և նրա գլխավորած «Արդարություն ու զարգացում» կուսակցության կարկառուն ներկայացուցիչները, ովքեր արդեն իսկ երեք անգամ անընդմեջ ընտրվել են պատգամավոր, մտադիր են լուրջ պայքար մղել ՏԻՄ ընտրություններում, և այս օրինագիծը կնպաստի խոշոր քաղաքներում հաղթելու դեպքում նրանց լիազորությունների ընդլայնմանը: