Ադրբեջանի պետական նավթային կազմակերպության (SOCAR) նախագահ Ռովնագ Աբդուլաևը, APA գործակալության հաղորդմամբ, ասել է, որ ներկայումս թուրքական Botas-ը, SOCAR-ը և «Շահ Դենիզ» ծրագրի գործընկերներն աշխատում են համագործակցության նոր պայմանագրի կնքման շուրջ, որը հիմնվում է անցյալ տարի երկու երկրների միջև կնքված հուշագրի հիման վրա:
Նոր պայմանագրով, որը կնքվելու է մինչև տարեվերջ, պլանավորվում է արտահանել տարեկան մինչև 24 միլիոն խորանարդ մետր գազ: «Շահ Դենիզի» պաշարները գնահատվում են մինչև 1,2 տրիլիոն խորանարդ մետր:
Հիշեցնենք, որ «Շահ Դենիզի» պայմանագիրը կնքվել է 1996թ. հունիսի 4-ին: Համաձայնության մասնակիցներն են եղել BP` 25,5% (օպերատոր), Statoil` 25,5%, NICO` 10%, Total` 10%, Lukoil` 10%, TPAO` 9%, SOCAR` 10% մասնակցությամբ:
SOCAR-ի նախագահ Ռովնագ Աբդուլաևը հայտարարել է. «Բացի այդ, մենք այժմ գազի վաճառքի շուրջ բանակցություններ ենք վարում մի շարք երկրների հետ, այդ թվում նաև Բուլղարիայի հետ, ով «Նաբուկո» կոնսորցիումի անդամ է»:
Հիշեցնենք, որ WikiLeaks-յան բացահայտումներից 2010 թվականի փետրվարի 25-ին թվագրված փաստաթղթում նշված էր, որ Ադրբեջանի նախագահ Իլհամ Ալիևն ԱՄՆ փոխպետքարտուղար Բիլ Բըրնսի հետ կայացած հանդիպման ժամանակ հայտարարել է, որ չի ցանկացել, որպեսզի Թուրքիան վերածվի էներգետիկ (տարանցիկ) կենտրոնի, ինչի համար էլ գազային պայմանագիր է կնքել Ռուսաստանի հետ. «Մենք այս պայմանագիրը կնքեցինք մեր թուրք բարեկամներին ցույց տալու համար, որ մենք չենք թույլատրի, որպեսզի Թուրքիան վերածվի գազաբաշխիչ կենտրոնի»:
Խոսքը 2009 թվականի հոկտեմբերի 15-ին Բաքվում SOCAR-ի և ռուսական «Գազպրոմի» կնքած գազային պայմանագրի մասին է, որով Ադրբեջանը պարտավորվեց 2010 թվականի հունվարի 1-ից տարեկան նվազագույնը 500 միլիոն խորանարդ մետր բնական գազ առաքել դեպի Ռուսաստան: